Dens la preparacion d’un entrevista d’emplec, e mei deu hons de l’argumentari, que’vs calerà preparar :

• los aspèctes logistics
• lo vòste mentau
• lo debanament

1.los aspèctes logistics

• Lo lòc : Avetz de trobar lo lòc on se tenerà l’amassada. Que vau melhor d’i anar, hè lo camin un dia abans entà estar segur que ne seretz pas perturbat peu cambiament. Plan véger on vos podetz parcar, lo trajècte lo mei simple (e pas forçadament lo mei rapide)...
• Lo vestit : Aquiu, de règlas n’i pas, que cau estar adaptat a las costumas deu sector. Que compreneretz plan que ne’s cau pas vestir de la medish faiçon entà obtiéner un jòb d’estiu coma per tribalhar de director o de cadre superiors dens ua entrepresa. Avisatz-vs de ne pas estar en descalatge dab las costumas deu mestièr, que cau s’adaptar e mei que mei hèr hidança. Que cau dar un impression de seriós, estar plan net, cohat, rasat... mes ne pas dar l’impression qu’ètz desguisats.
• Çò qu’avetz de portar dab vos : Entà anar a ua entervista que’vs cau portar mantuas causas que’vs poden servir pendent l’entrevista, entà emparar la vòsta reflexion e tanben entà estar un drin mei tranquille.
  • Portar mantuns CV, adaptats a l’entrevista, distribuir un a cada participant e entà vosautes, guardatz un CV anotat sus lo quau auretz preparat çò que cau absoludament díser a l’entrevista e quauques arguments entà provar çò qu’afirmatz.
  • Portar tanben la letra de motivacion, se hè necèra que la podretz distribuir, se que non, qu’auretz de gardar ua dab las anotacions entà’vs emparar dessús pendent l’entrevista. Aquesta faiçon de hèr dab lo CV e la letra, qu’ei rassegurant, n’auretz pas tan paur d’estar blocat mentre que se passa l’entrevista. Amuisha ua rigor, un seriós, un saber comunicar e un metòde, qu’ei a díser un biaish de hèr professionau.
  • Un estilo e uas paginas blancas : mentre que parlen los vòstes interlocutors, qu’auretz d’escotar e de tostemps pensar a ne copar pas la paraula. Entà estar segur de ne pas desmembrar arren, que deveratz notar tots los arguments de las responsa a mesura. Tanben, còps que i a, dab l’ància, lo monde qu’an tendéncia a hèr gèste parasite, e amuishar la sua paur. Lo hèit de tiéner quauquarren que’vs pòt ajudar a mestrejar los vòstes nèrvis. Escríver quauques mots entà preparar la responsa, vos va ajudar a concentrar-vos e a dar’vs credibilitat tanben de cap aus interlocutors.

2.la preparacion morau :

Au parrat de l’entrevista d’emplec qu’auretz d’amuishar que, en mei de las vòstas competéncias e de las vòstas coneishenças, posseditz ua personalitat en adequacion dab çò qu’espèra l’entrepresa.

Que va donc caler dar hidança a l’emplegaire e au monde qui recrutan, dominar la sua ància shens - çò qu’ei enqüèra sordeish - dar l’impression d’estar ua persona orgulhosa e tròp segura d’era medeisha.

Entà estar lo mai tranquille possible, la sola causa de hèr qu’ei de tot preparar lo mei possible, de l’argumentacion aus detalhs logistics.

Qu’avetz de plan preparar l’entrevista : un còp qu’avetz tot preparat au nivèu de las responsas, qu’avetz de practicar a casa, de’vs hicar en situacion de respóner a questions, plan véger los arguments, las faiçons de’us díser, lo vocabulari... Au finau que seràn tostemps las medeishas questions, las podetz anticipar.

Entà estar plan lo dia de l’entrevista, que devetz pensar a mantuas questions :

• l’òra d’arribada : que cau plan saber que, sovent lo hèit d’estar dens lo bastiment de l’entrevista provòca l’ància. Ne vau pas la pena d’arribar tres quart d’òra a l’avança. Que vau melhor arribar un drin d’òra dens lo barri, préner un veire o hèr quauquarren mei, e, despuish, anar en caminant a lòc de l’entrevista entà n’arribar pas sonque dab detz minutas d’avança.
• Çò qui minjatz : En foncion de l’òra de l’examen, non cau pas aver hami o estar en plea digestion. Ja, qu’ei complicat mentaument d’anar de cap a ua entrevista d’emplec, alavetz, que vau melhor evitar tots los problèmas exteriors que s’i poden ajustar.

3.lo debanament de l’entrevista :

Ua entrevista d’emplec que compren tostemps las tres medeishas partidas :

• La presentacion : Que’vs cau apréner de’vs presentar en 5 minutas. Plan segur, qu’avetz de presentar aspèctes positius e en ligason dab l’entrevista, en acaban sus lo perque ètz aquí.
• Lo còr de l’entrevista : lo moment de las questions sus las competéncias, las experiéncias, lo CV...
• La conclusion : tradicionaument qu’ei lo moment on auretz la possibilitat de questionar lo monde suu pòste de tribalh. Qu’auretz donc d’amuishar un darrèr còp lo vòste interès en parlant condicions de tribalh (salari, precisions suu pòste...), integracion deus navèths dens l’entrepresa, la possibilitat de carrièra au deguens de l’entrepresa o de l’associacion, e ua data a partir de quan e seratz tornats contactats.