Sètz aquí : Acuèlh > Formacions permanentas > Mestièrs en occitan > Dintrar en formacion a Aprene
emploi
emploi
Dintrar en formacion a Aprene
Dintrar en formacion a Aprene

Aprene es lo centre a Besièrs que dispensa la formacion per venir regent dins una Calandreta. Aquela formacion se debana sus tres ans, un an de mai que lo monde que se destinan a ensenhar dins lo public :

lo temps de plan s'immergir dins lo banh Calandreta, de plan veire los foncionaments ja en plaça dins las diferentas escòlas (veire la fica sul debanament de la formacion al centre Aprene) Per dintrar en formacion a Aprene, cal passar l'espròva de "la Jurada". Cada an, las inscripcions a aquela espròva son notadas dins l'Agendà del Servici de l'emplec. Es necessari, per poder passar la Jurada de : - aver un nivèl licéncia - practicar l'occitan a l'oral coma a l'escrit (se cal far desliurar una atestacion per una associacion de promocion de la lenga occitana). - aver lo brevet de 50m en nada liura - possedir una atestacion de formacion als primièrs secorses (AFPS). La Jurada es compausada de quatre espròvas escritas e d'un entreten. 1 - L'escrit : per aprestar l'escrit, una bibliografia es publicada cada an, de retrobar sul site del Centre Aprene : www.aprene.org, englobant tant una cultura generala en occitan coma las autras matèrias a ensenhar (matematicas,francés, òbras de fons). Lo contengut de l'espròva escrita es globalament similar d'un an sus l'autre. En 2009, lo debanament de l'escrit èra aqueste : A - L'espròva de lenga occitana (coef : 2). Una version : revirar del francés a l’occitan (16 punts), una analisi d’imatge de redigir en occitan (12 punts), un tèma : revirar un tèxt, tirat de la bibliografia, de l’occitan cap al francés (12 punts). Durada : 1h45. Nòta eliminatòria : 10/40. B - Trabalh de pensada (coef : 1). Causir entre dos subjèctes directament ligats al programa e redigir un tèxt estructurat en occitan per analisar la question evocada pel subjècte causit. Son avaloradas : - las competéncias per avisar mantunes vejaires e argumentar al dintre d'una problematica simpla mas plan pausada. - la qualitat de la forma : plan, encadenament logic de las idèas - la cultura generala : referéncias a d’autors o de pensaires, de corrents de pensada, citacions... Los candidats redigiràn en òc (20 punts). Se o pòdon pas seràn notats sus 15 pts. Durada : 1h45. Nòta eliminatòria : 5/20. C - Francés (coef : 1). A partir d’un o mai d’un tèxt tirat de las òbras al programa, e qualques questions que lo candidat i respondrà en francés corrècte : son avalorats lor nivèl de lenga escrita, la capacitat d’analisi, de sintèsi e d’imaginacion. La lectura de las òbras al programa es indispensabla per poder respondre a las questions. Durada : 1h45. Nòta eliminatòria : 5/20. D - Matematicas (coef : 1). D’exercicis de calcul, d’algèbra, de conversions de mesuras, de proporcionalitat, de geometria, de logica. Durada : 2h. Los candidats portaràn de material per la geometria, mas la calculeta es pas autorizada. Los candidats redigiràn en occitan. Senon seràn notats sus 15 pts. Nòta eliminatòria : 5/20. 2 - L'oral : Se debana dins la setmana que seguís l'ecrit. Es un entreten de 45 minutas que se fa en occitan. La tòca es de melhor conéisser los candidats. Los candidats son convocats per corrièr electronic e que lor preciza cossí aprestar l'entreten. En 2008 per exemple, lo supòrt de l'entreten èra un document imprimit, fait per cada candidat apartir d'un logicial de tractament de tèxte (material informatic necessari fornit pel Centre). Inscripcions, entresenhas : APRENE - establiment d'ensenhament superior occitan 15 carrièra del general Margueritte 34500 Besièrs tel : 04.67.28.75.36 - fax:04.67.28.75.39 www.aprene.org