Sètz aquí : Acuèlh > Formacions permanentas > Las certificacions de Lenga > Dispositius de presa en carga de las formacions CIF, DIF, Plan de (...)
emploi
AGENDÀ de l'EMPLEC
emplec
emploi
emploi
Dispositius de presa en carga de las formacions CIF, DIF, Plan de formacion
Dispositius de presa en carga de las formacions CIF, DIF, Plan de formacion

Lo drech individual a la formacion (DIF) es un dispositiu destinat a permetre als salariats e foncionaris franceses de seguir d’accions de formacion professionala continua.

Drech individual a la formacion

  • a lei : lo drech individual a la formacion foguèt mes en plaça en drech del trabalh per la lei 2004-391 del 4 de mai de 2004. Uèi, fa l'objècte dels articles L.6323-1 e seguents del novèl còde del trabalh. S'apond a las autras modalitats de formacion continua pels salariats tot lo long de lor vida activa, que son, en particular, lo comjat individual de formacion (CIF) e lo plan de formacion. Lo DIF foguèt espandit a la foncion publica per doas leis de febrièr de 2007 e lors decrets d'aplicacions preses en 2007 e 2008. Çaquelà, las modalitats ne son leugièrament diferentas.
  • Mesa en practica:Aquel dispositiu beneficia a tot salariat que dispause d'al mens un an d'ancianetat dins l'entrepresa, que siá titular d'un contracte de trabalh de durada indeterminada o pas. Aquel drech correspond a una durada de 20 oradas de formacion per an (los periòdes d'abséncia talas coma : comjat de maternitat, comjat parental... son integralament preses en compte Art L. 6323-2 del còde del trabalh), cumulables dins lo limit de sièis annadas pels salariats de temps plen e de 120 oradas quin que siá lo nombre d'annadas pels salariats de temps parcial. A defaut de son utilizacion, aquel DIF demòra limitat a 120 oradas. Dins lo privat, un acòrd de branca mai generós pòt preveire una durada mai elevada. Dins los cases de temps parcial o de CDD, los dreches son proratizats. Per exemple, un salariat en CDD de temps parcial sus un contracte de 17,50 oras per setmana e una durada de contracte de 6 meses aurà drech a 20 oras * 17,5 oras / 35 oras * 6 meses / 12 meses = 5 oras En cas de licenciadament (levat per fauta grèva), lo "temps formacion" es convertit en "budgèt formacion". La règla aplicada de costuma per l'emplegaire es la seguenta : nombre d'oras aquesidas al títol del DIF X 9,15 €. Dins aquel cas, l'eventual diferencial es a la carga del salariat licenciat.
  • Obligacions e renovèlament : cada annada l'emplegaire deu informar los salariats per escrich del total de lors dreches aquesits al títol del DIF. Per metre en òbra aquesta formacion, lo salariat deu prene l'iniciativa de demandar a son emplegaire son acòrd sus la causida de l'accion de formacion. L'emplegaire dispausa d'un mes per acceptar o refusar la proposicion del salariat ; a defaut de responsa dins aquel relambi, lo salariat es en preséncia d'una decision implicita d'acceptacion de son emplegaire e aquò, dins los tèrmes de la demanda. Normalament, lo DIF deu far l'objècte d'un acòrd escrich (levat se decision implicita d'acceptacion). La formacion se debana en principi en defòra del temps de trabalh (levat acòrd collectiu o convencion, o quitament acòrd dirècte entre lo salariat e son emplegaire). Las oras de formacion realizadas pendent lo temps de trabalh dobrisson drech al versament del salari ; las que son realizadas en defòra del temps de trabalh dobrisson drech al versament d'una allocacion de formacion egala al nombre d'oras utilizadas fòra temps de trabalh X 50 % del taus orari net mejan. Dins lo privat, lo salariat pòt renovelar sa demanda autant de còp qu'o desira. Aquò dich, en cas de desacòrd persistent sus dos exercicis civils consecutius, lo salariat pòt demandar a l'OPACIF que ne relèva l'entrepresa de prene en carga la formacion ; la formacion se debanarà alara dins lo quadre d'un Comjat Individual de Formacion (CIF).

 

Lo comjat individual de formacion

Lo comjat individual de formacion (CIF) es un dispositiu de formacion disponible en França pels salariats jos cèrtas condicions. Permet a tot emplegat de s'absentar pendent las oras de trabalh dins la tòca de seguir a títol individual l'accion de formacion que desira, en totala independéncia. Se distinga doncas d'autres dispositius de formacion que son d'una part la formacion organizada a l'iniciativa de l'emplegaire e prevista pel plan de formacion de l'entrepresa s'existís, d'autra part lo drech individual a la formacion, mes en òbra en coconstruccion amb l'emplegaire.

  • Modalitats : Los motius del comjat individual de formacion son tant variats coma personals : per accedir a un nivèl superior de qualificacion, per cambiar d'activitat o de sector (mobilitat o reconversion), per se dobrir mai largament a la cultura, a la vida sociala o a l'activisme associatiu benevòl, enfin per preparar un examèn. Per beneficiar d'un comjat individual de formacion, lo candidat deu èsser dins una de las tres situacions seguentas :
    • èsser en CDI e aver trabalhat al mens dos ans en tant que salariat dont 12 meses dins l'entrepresa,
    • aver trabalhat al mens quatre meses en CDD e aver trabalhat al mens dos ans dempuèi cinq ans,
    • aver efectuat 1600 oradas en interim durant los 18 darrièrs meses.
  • Existís un relambi de franquisa (DF) : un salariat qu'a ja beneficiat d'un CIF, i pòt pas pretendre una segond còp dins la meteissa entrepresa abans un cèrt relambi dich relambi de franquisa egal al dotzen de la durada en oras del precedent comjat. Aqueste relambi de franquisa pòt pas èsser inferior a 6 meses ni èsser superior a 6 ans. Aqueste relambi de franquisa es pas valable pels comjats per examèns : se ne pòt demandar autant coma i a d'examèns.

Lo comjat pòt pas durar mai d'un an se s'agís d'un estagi a temps plen, 1200 oras maximum se la formacion es discontinua o a temps parcial. D'acòrds pòdon preveire de duradas mai longas, en particular dins d'unes sectors (sustot comèrci, servici, artesanat e industria per de rasons evidentas de programas). Aquelas duradas pòdon èsser augmentadas s'i a un acòrd de l'emplegaire mas los finançaments seràn plafonats.

  • Mesa en òbra : La demanda deu èsser formulada per escrich al pus tard 60 jorns a l'avanci per un estagi de mens de 6 meses, 120 jorns a l'avanci per un estagi qu'entraïna una interrupcion de trabalh de mai de 6 meses. La responsa de l'emplegaire deu intervenir dins los 30 jorns. Un refús de sa part es possible sonque en cas de non conformitat de la demanda o de las condicions relativas a l'estagi perque lo comjat de formacion es de drech, e l'abséncia de responsa val acceptacion tacita. Tanben, un còp acordat, l'emplegaire pòt pas tornar sus sa decision. Lo despart en cas de refús en formacion, s'es pas formulat coma prejudiciable a l'entrepresa, pòt pas entraïnar lo licenciadament del salariat. Çaquelà, de rasons per diferir lo comjat son possiblas per de rasons divèrsas. En particular, se aprèp avís del comitat d'entrepresa o dels representants del personal es decidit qu'aquesta abséncia pòt aver de consequéncias prejudiciablas sus la marcha de l'entrepresa (produccion principalament), lo despart pòt èsser reportat. Aquel repòrt s'es acceptat pòt pas èsser superior a 9 meses, de delà, es caduc.                                              La presa en carga es definida precisament pel contracte de trabalh. Lo salariat deu presentar sa demanda de presa en carga a l'OPACIF/FONGECIF al qual son emplegaire vèrsa sa contribucion-formacion. Dins aquel cas, la presa en carga es calculada sus la remuneracion qu'auriá percebuda s'aviá contunhat de trabalhar. Lo salariat pòt conservar jos cèrtas condicions 80 a 100% de son salari (o 60 a 90%), qu'es finançat pel FONGECIF o un organisme paritari collector agradat (OPCA). L'entrepresa o lo salariat pòdon èsser menats a pagar lo tiquet moderator. Lo refús per l'organisme paritari es possible e lo salariat pòt far un recors graciós. Pendent lo comjat, lo salariat deu remetre a l'emplegaire a cada fin de mes una atestacion efectiva d'estagi. Lo CIF entraïna la suspension del contracte de trabalh, autrament dich, lo periòde de formacion es assimilat a un temps de trabalh que val per comjats pagats e calcul d'ancianetat. En revenge, lo salariat perd son pòste de trabalh e pòt pas, de retorn de CIF, exigir sa reïntegracion a la meteissa plaça. L'entrepresa li prepausa sovent un pòste de mai febla qualificacion a títol transitòri (dins l'espèra de fin de contracte del CDD de remplaçament), se lo refusa, i a alara motiu de rompadura de contracte de trabalh.

 

Lo plan de formacion

Lo plan de formacion regropa l’ensemble de las accions de formacion definidas dins lo quadre de la politica de gestion del personal de l’entrepresa. Tanben pòt preveire d'accions de bilances de competéncias e de validacion dels aquesits de l’experiéncia e prepausar de formacions que participan a la lucha contra l’iletrisme. L’elaboracion del plan de formacion es assegurada jos la responsabilitat plena e entièra de l’emplegaire, aprèp consultacion dels representants del personal.

  • Quinas son las accions de formacion que relèvan del plan de formacion ?

Lo plan de formacion pòt comportar dos tipes d’accions :

  1. accions que visan a assegurar l’adaptacion del salariat al pòste de trabalh o ligadas a l’evolucion o al manteniment dins l’emplec dins l’entrepresa ;
  2. accions qu'an per objècte lo desvolopament de las competéncias dels salariats.
  • Quines son los dreches e los devers del salariat pendent la formacion ?

Èsser en formacion dins lo quadre del plan de formacion es assimilat a l’execucion normala del contracte de trabalh : lo salariat deu doncas seguir amb assiduitat la formacion e se pòt pas opausar a la decision eventuala de l’emplegaire de lo reïntegrar a son pòste de trabalh abans la fin de la formacion.

Durant aqueste periòde, lo salariat contunha d'èsser remunerat e consèrva sa proteccion sociala costumièra. S'un accident se produsís al cors de la formacion, s’agirà d’un accident del trabalh.

Lo còst de la formacion demòra a la carga de l’entrepresa. Los fraisses de restauracion e d’albergament ocasionats per la formacion son remborsats o preses en carga dirèctament per l’emplegaire segon las règlas aplicadasde costuma dins l’entrepresa per las missions professionalas.

  • La formacion se pòt debanar en defòra del temps de trabalh

La formacion mesa en òbra dins lo quadre del plan de formacion se debana en principi pendent lo temps de trabalh. Çaquelà, cèrtas accions de formacion pòdon, dins cèrtes limits, se debanar en defòra del temps de trabalh efectiu.

  • Accions d’adaptacion o ligadas a l’evolucion o al manteniment dins l’emplec

    Tota accion de formacion seguida per un salariat per assegurar son adaptacion al pòste de trabalh o ligada a l’evolucion o al manteniment dins l’emplec dins l’entrepresa constitua un temps de trabalh efectiu e provòca pendent sa realizacion al manteniment per l’entrepresa de la remuneracion.

  • Accions de desvolopament de las competéncias

    Aquelas accions pòdon, en aplicacion d’un acòrd escrich entre lo salariat e l’emplegaire, que pòt èsser denonciat dins los 8 jorns de sa conclusion, se debanar en defòra del temps de trabalh efectiu dins lo limit de 80 oras per an e per salariat o, pels salariats que la durada de trabalh es fixada per una convencion de forfach (en jorns o en oras) sus l’annada dins lo limit de 5 % de lor forfach.

Lo refús del salariat de participar a d'accions de formacion en defòra del temps de trabalh o la denonciacion de son acòrd dins los 8 jorns constituís pas ni una fauta ni un motiu de licenciadament.

Quand son realizadas atal, en defòra del temps de trabalh, las oras de formacion provòcan lo versament per l’entrepresa d’una allocacion de formacion d’un montant egal a 50 % de la remuneracion neta de referéncia del salariat concernit (aquesta allocacion es exonerada d'escotissons socials, de CSG e de CRDS). Las modalitats de determinacion del salari orari de referéncia per l’allocacion de formacion son fixadas per l’article D. 6321-6 del còde del trabalh. Pendent la durada de la formacion, lo salariat beneficia de la legislacion de la seguretat sociala relativa a la proteccion en matèria d’accidents del trabalh e de malautiás professionalas. En otra, quand tot o partida de la formacion se debana en defòra del temps de trabalh, l’entrepresa deu definir amb lo salariat, abans son despart en formacion, la natura dels engatjaments als quals soscriu tre alara que l’interessat aurà seguida amb assiduitat la formacion e satisfach a las avaloracions previstas. Aqueles engatjaments pòrtan :

  • sus las condicions dins las qualas lo salariat accedís en prioritat dins un relambi d’un an a l’eissida de la formacion a las foncions disponiblas que correspondon a las coneissenças aquesidas e sus l’atribucion de la classificacion que correspond a l’emplec ocupat ;

  • e sus las modalitats de presa en compte dels esfòrces acomplits pel salariat.

  • Quand un acòrd de branca lo prevei, una majoracion d’al mens 10 % de l’allocacion de formacion es acordada al salariat qu'engatja de fraisses suplementaris de garda d’enfant per tal de seguir una accion de formacion en defòra de son temps de trabalh. Coma l’allocacion de formacion, aquesta majoracion es exonerada de cotisacions socialas, de CSG e de CRDS.

  • Quand la formacion a luòc a l’iniciativa del salariat amb l’acòrd de son emplegaire o quand se debana en defòra del temps de trabalh amb l’acòrd del salariat e que la formacion a en particular per objècte l’obtencion d’un diplòma, d’un títol amb finalitat professionala, d’un certificat de qualificacion professionala, los elements seguents fan l’objècte d’una convencion amb la persona que beneficia de la formacion (es a dire lo salariat) : intitolat, natura, durada, efectius, modalitats del debanament e sanccion de la formacion.

 

Lo salariat pòt demandar o refusar de seguir una formacion dins lo quadre del plan de formacion ?

Lo salariat pòt demandar a seguir una formacion prevista dins lo plan de formacion de l’entrepresa. La lei impausa pas cap de procedura : la demanda e la responsa son formuladas liurament, segon los usatges o las disposicions convencionalas que pòdon existir dins l’entrepresa.

Se l’emplegaire accèpta, lo despart en formacion del salariat demòra assimilat a l’execucion normala del contracte de trabalh e pòt pas èsser requalificat en comjat individual de formacion.

En revenge, un salariat pòt pas refusar de seguir una formacion dins lo quadre del plan de formacion : la demanda de l’emplegaire relèva de son poder de direccion, s’i sometre pas pòt èsser qualificat de fauta professionala. Çaquelà, existisson d'excepcions :

  • lo bilanç de competéncias : l’emplegaire pòt pas contrénher un salariat a seguir un bilanç de competéncias. Lo refús del salariat aqueste pòt pas constituir, segon lo Còde del trabalh, « ni una fauta, ni un motiu de licenciadament » ;

  • de condicions de despart en formacion susceptiblas d’èsser assimiladas a una modificacion del contracte de trabalh (formacion particularament longa, fòrça alunhada, demanda de despart precipitat) o reveladoira d’una volontat manifèsta d’entravar l’execucion del mandat d’un representant del personal. Per esséncia litigiosas, las consequéncias de refús del salariat seràn decididas al cas per cas, eventualament, pel conselh de prud’òmes ;

  • la formacion se debana en tot o partida en defòra del temps de trabalh. Lo refús del salariat pòt pas èsser considerat ni coma una fauta, ni coma un motiu de licenciadament ;

  • la validacion dels aquesits de l’experiéncia davant una jurada en vista d’obténer tot o partida d’un diplòma o d’un títol professional. L’emplegaire pòt pas impausar una tala validacion : supausa lo consentament del salariat e son refús constituís pas ni una fauta, ni un motiu de licenciadament (vejatz « La validacion dels aquesits de l’experiéncia »).

  • Qué se passa aprèp la formacion ?

Lo salariat reïntègra son pòste de trabalh, o un pòste equivalent de remuneracion e qualificacion egalas.

L’emplegaire a pas cap d'obligacion de reconéisser las competéncias aquesidas al cors de la formacion (per un cambiament de qualificacion, una augmentacion de remuneracion…), levat quand s’i es engatjat, o alara, se lo contracte de trabalh o la convencion collectiva aplicabla a l’entrepresa prevei aquesta reconeissença (sul cas particular de las accions de formacion qu'an per objècte lo desvolopament de las competéncias, vejatz las precisions çaisús).

Lo salariat es liure de demissionar. Çaquelà, son contracte de trabalh pòt comportar una clausa de dedich formacion per la quala s’engatja a demorar un cèrt temps al servici de l’entrepresa jos pena de remborsar los fraisses de la formacion qu’a seguida. Aquel tipe de clausa es licita amb cèrtas condicions, en particular se l’engatjament exigit del salariat es pas excessiu (durada del servici demandada tròp longa, somas de remborsar exorbitantas…) e s’entrava pas sa libertat de demissionar.

 

Ofèrtas de formacions als CFPO :

Besièrs :

  • Setmanièrs

  • Estagis parlar

  • Formacion de formators

  • Formacion d'insercion

  • Formacion gestion associativa cf IEO. Possibilitat de far intervenir lo CFPO Besièrs (agradat joenessa e espòrt) sus tot lo territòri per prepausar aquela formacion. Intervencions als autres CFP facturadas.

Ortès :

  • Setmanèrs

  • Estagis parlar

Tolosa :

  • Setmanièrs

  • Estagis parlar començaires, perfeccionament e ASEM

  • Formacion a distància Pyramide:CR Miègjorn-Pirenèus

 

Los OPCA :

Cada emplegaire cotisa alprèp d'un OPCA : Organisme Paritaire de la Collecteur agréés.

Es liure de causir lo que li agrada lo mai. Sovent, las associacions del domeni socio-cultural cotisan a Uniformation, las d'artistas a l'AFDAS. Los CFPO de Besièrs e Tolosa cotisan a OPCALIA. Los OPCA son Fongecif o ANFH pels foncionaris.