CERCAR UN EMPLEC

Far lo punt sus son perfil, trobar lo bon emplec ont cal, etc. Dins aquesta rubrica trobaretz totes los conselhs per menar una recèrca d'emplec eficaça, en amont d'una candidatura.

A. Servi's de la sua ret

B. Organizar la sua recèrca

C. Lo desmarchatge telefonic

D. Ua auhèrta en occitan, cò que càmbia ?

E. Ciblar ua entrepresa

F. Causir ua auherta d'emplec

G. Analisar lo sué perhiu

A. Servi's de la sua ret

En mestior de recèrca d’emplec, non crentetz pas de hèr servir las vòstas relacions. L’idea qu’ei de plan assabentar de la vòsta recèrca lo monde que’vs pòden ajudar pr’amor la ret qu’ei un deus mejans los mei eficaç entà trobar un emplec.

 

1. La vòsta ret

La vòsta ret se constitueish de l'ensem de las personas que'vs pòden ajudar d'ua faiçon o d'ua auta dens la vòsta recèrca. Aqueras personas que poden hèr part :

- de la vòsta familha

- deus vòstes amic,

- deu vòste entorn professionau (collègas, clients, hornidors...)

Plan segur, tostemps, qu'auretz de contactar mond dab qui vos endevienetz plan. Ne cau pas aver vergonha d'estar au caumatge. Ne podem pas jamei saber qui coneish qui e benlèu qu'avetz un amic que coneish un amic son o quauqu'un mei que'vs pòt interessar d'encontrar.

2. Quan utilizar la sua ret ?

Plan segur, que devetz activar la vòsta ret quan cercatz un emplec, mes tanben quan voletz avançar dens la vòsta carrièra, cambiar de mestièr o crear la vòsta entrepresa.

3. Quau messatge ?

Lo servici que vatz demandar a la persona que deu estar adaptat a la natura de las vòstas relacions. Que cau que lo vòste interlocutor e'vs posca respóner aisidament, shens estar geinat de hèr çò que'u demandatz e que la vòsta demanda sia hèra clara.

 

Que poderetz cercar :

- entre-senhas sus ua entrepresa e la sua futura politica de recrutament

- demandar de hèr passar lo vòste CV

- demandar un contacte

- demandar de contactar quauqu'un entà vos

- demandar s'ei assabentat de la creacion de pòstes o se coneish personas a contactar absoludament....

Lo nivèu de demanda deu plan estar fixat per la vòsta relacion, ne cau pas perturbar la persona. Au finau un còp mei, que cau plan véger que la recèrca d'emplec ei mei que mei un tribalh de comunicacion. Que cau plan hèr conéisher la vòsta situacion e plan diferenciar la vòsta comunicacion en foncion de las personas e de çò qu'esperatz d'eras.

4. Las precaucions de bon préner

Que cau tostemps manipular la vòsta ret dab hèra precaucions.

Que'vs cau avisar de :

- ne pas tròp pressar lo vòste monde

- ne pas tròp insistir - ne pas desturbar la persona

- estar onèste, plan díser çò que cercatz e perque.

- pensar a la persona a qui demandatz : plan conéisher la sua situacion, e l'informacion de la perseguida de la vòsta recèrca.

- tostemps estar reconeishent e ne pas demandar quauquarren a quauqu'un per qui ne haretz pas la medeisha causa.

 

5. Plan preparar aqueras petitas entrevistas

Que vatz demandar ajuda e donc drin de temps a monde qui'vs van ajudar a trobar un emplec.

Quan ne seré pas entà aver ua discutida tròp formau que cau au mensh un minimum estructurar la vòsta demanda :

- començar l'entrevista per controlar se la situacion deu vòste interlocutor ne cambiè pas (evitar de sollicitar quauqu'un se sabetz qu'a problèmas professionaus).

- presentar la vòsta situacion shens ambigüitat e objectivament, ne vau pas la pena de's plàner, insistir...

- formular ua demanda clara, accessibla que ne desturba pas lo vòste interlocutor, e n'exigeish pas un gran esfòrç entà eth.

- ne pas desmembrar de'u passar un CV entà emparà's dessús se hè necèra (CV que permeterà a la persona de'vs tornar contactar).

 

B. Organizar la sua recèrca

Plan segur quan cercatz un emplec, vos cau aver ua bona organizacion entà tractar cada auhèrta. Mes tanben que’vs hè necèra organizar plan la vòsta recèrca d’emplec. Aquò que va au delà de la juxtaposicion de las vòstas auhèrtas dens un medeish dossièr e deu hèit de plan tractar cada auhèrta.

Plan organizar la sua recèrca qu'ei ordonar tot aqueras candidaturas, que sian responsas a auhèrtas d'emplecs o candidaturas espontanèas, entà estar lo mei eficaç possible e melhorar las vòstas responsas a mesura que postulatz a navèths pòstes.

Entà plan mestrejar tot lo vòste procèssus de recèrca d'emplec que cau :

  • plan guardar e ordonar totas las vòstas candidaturas,

  • hèr un tablèu recapitulatiu,

  • trobar auhèrtas pareishudas entà adaptà's a navèras candidaturas.

 

1. La classification de las vòstas candidaturas

Au parat de la vòsta recèrca d'emplec qu'auretz de guardar totas las vòstas auhèrtas, letras de motivacion e CV, puish classificar-los :

  • d'un costat : las responsas a las auhèrtas d'emplecs,

  • de l'aute costat : las candidaturas espontanèas, Vos que podetz obrir un dossièr "candidaturas” dab au-deguens dus dossièrs ("auhèrtas” e candidaturas espontanèas).

2. Lo tablèu recapitulatiu

Lo vòste tablèu que'vs deu perméter de :

  • hèr lo seguit de las vòstas candidaturas. Que cau plan véger las auhèrtas que son obèrtas enqüèra a las candidaturas , e las autas.

  • se poder preparar entà preparar ua entrevista (en trobant lèu lèu la letra e lo CV qui corresponen a l'auhèrta d'emplec o a la candidatura espontanèa),

  • respóner d'un biaish mei eficaç en trobar las auhèrtas e las letras e CV que pareishen a la candidatura qu'avetz de mandar. Entà vos ajudar dens totas aqueras tascas que deveratz elaborar un tablèu dab mantuas rubricas : lo pòste de tribalh, l'entrepresa (o l'intermediari encargat deu recrutament), la referéncia de l'auhèrta, data de mandadís de la candidatura, data limita entà participar e las exigéncias de l'emplegaire (diplòma e competéncias).

3. Tribalhar per comparasons entà ua navèra auhèrta

Prenètz las vòstas ancianas candidaturas en comparant dab las auhèrtas qui corresponen e espiatz quin avetz hèit entà argumentar a cada còp en foncion de las exigéncias (tant au nivèu deu CV que de la letra de motivacion). Un còp aver espiat çò qui hasotz, que'vs devetz demandar s'avetz dat ua argumentacion de las bonas. Dens aqueste cas e s'ei plan adaptada a l'auhèrta, que poderetz tornar repréner lo vòste tribalh sus la basa deu medeish argumentari. Au contrari, plan segur qu'auretz de tornar tribalhar la vòsta argumentacion se n'ei pas adequata. E fin finau, qu'auretz de cercar en que la navèra auhèrta d'emplec ei desparièra de las ancianas, entà plan adaptar la vòsta candidatura e pegar a las exigéncias navèras.

 

C. Lo desmarchatge telefonic

La tòca d’aqueste desmarchatge qu’ei de trobar entresenhas sus un sector o ua entrepresa entà validar lo vòste ciblatge e favorizar las vòstas candidaturas espontanèas.

Quan emplegar lo desmarchage telefonic ? Lo desmarchatge telefonic que pòt estar interessant :

  • Abans de hèr ua candidatura espontanèa, s’avetz enveja de postular dens ua entrepresa, mes qu’avetz questions d’esclarir :

    • entà saber a qui adreçar la letra. Véger se lo mei interessant ei de contactar lo responsable de la ressorsas umanas o lo responsable tecnic.

    • entà conéisher plan la politica en matèria de ressorsas umanas de l’entrepresa : e va emplegar sus pòstes equivalents lèu o pas ?

    • s’avetz ua grana question relativa a la tienuda deu pòste de tribalh dens l’entrepresa : organizacion, utís, coneishenças necessàrias.... Alavetz qu’auretz de parlar dab un tecnician entà saber se podetz mandar la candidatura.

  • entà conéisher un sector o ua entrepresa, plan segur que podetz tanben sonar entà aver entre-senhas sus l’entrepresa mes tanben sus un sector d’activitat en lo quau n’avetz pas tribalhat mes on podetz transferir las vòstas competéncias.

Quin hèr ?

Ne cau pas jamei estar pesuc e desturbar lo sué mond. Au contrari, tanpòc, ne cau pas dar l’impression d’aver paur e de’s desencusar cada 20 segondas.

Que’vs cau donc, atau coma de costuma mentre que cercatz un emplec, preparar la comunicacion entà estar eficaç. En sonant, qu’auretz de :

  • Presentà’vs lèu mès plan,

  • Assegurà’vs que parlatz a la bona persona o demandar la persona o lo servici capable de’vs respóner,

  • Presentar l’objècte de la vòsta sonada dab duas o tres frasas prèstas qui amuishan lo vòste interès shens entrar dens cap de detalhs. La question qu’ei donc lèu pausada. Que deu estar tanben hèra aisit d’i respóner entà la persona de l’entrepresa.

Lo hèit d’aver pausat ua question e que l’emplegaire aja responut atau coma calèsse entà vosautes que’vs permeterà de’u díser, qu’alavetz e vatz mandar lo vòste CV (plan segur dab la letra) e que’u tornaratz sonar, un còp hèita aquera candidatura.

Qu’ei tanben possible que sia l’emplegaire qui’vs demandi de hèr acte de candidatura mentre qu’ètz au telefòne. Sia que’vs pòt demandar de mandar ua letra, sia que’vs pòt demandar ua entrevista.

Dens aquera situacion, poderatz pensar que la vòsta comunicacion èra ua escajuda, qu’a marcat lo vòste interlocutor e que gràcias a aquesta sonada avetz avançat dens la vòsta candidatura.

Un còp explicat lo vòste desir d’encontrar l’entreprenaire, e qu’avetz dit au vòste interlocutor que’u tornaratz sonar un còp la letra mandada, pensatz plan que benlèu entà aquera entrepresa, la vòsta situacion n’ei pas la prioritat absoluda e ne devetz pas tiralhar aquera persona au telefòne. Atau, que seré segur que n’obtieneretz pas lo vòste pòste.

D. Ua auhèrta en occitan, çò que càmbia ? 

Abans tota auta consideracion, que cau plan compréner que quan seré ua auhèrta en occitan, ua auhèrta d’emplec e demora ua auhèrta d’emplec. Aquò qu’implica lo vòste dever de seguir uas exigéncias de formalitat (véger las ficas sus : lo CV, la letra de motivacion, l’entrevista d’emplec).

L’objectiu qu’ei d’amuishar qu’avetz totas las competéncias e las aptituds entà plan ocupar un pòste de tribalh dat. Alavetz vos hè necèra muishar lo vòste professionalisme au parat de totas las etapas de la vòsta candidatura.

Que devetz seguir totas las règlas costumèras, atau com s’estosse ua auhèrta d’emplec redigida en francés.

La sola question que’vs devetz pausar ei aquera de la lenga dens la quau e vatz redigir la letra de motivacion e lo CV.

Aquiu que cau véger mantuas possibilitats :

  • Benlèu que la lenga ei demandada au deguens de l’auhèrta : Per exemple : "Fournir une lettre de motivation en occitan”... qu’avetz donc de hèr exactament çò qui ei previst ni mei ni mensh, pr’amor la vòste capacitat a hèr çò que s’espèra de vos ei importanta tanben.

  • Se l’auhèrta ei redigida en occitan : Podem pensar qu’ei entà estar segur d’aver quauqu’un qui mestreja la lenga. Auretz donc d’ac amuishar en responent dab ua letra de motivacion e un CV en occitan.

  • Si responetz a ua auhèrta on l’occitan ei demandat coma ua competéncia (atau com ua auta lenga) :

  • Auretz de respóner a aquera auhèrta en francés e de plan hicar en davant dens lo vòste CV la mestresa de l’occitan dab formulas atau com : "occitan langue maternelle”, "occitan courant”, "occitan parlé, lu et écrit”

  • O gràcias a l’obtencion de diplòmas que poderatz estipular, o en díser qu’avetz seguit de cors en escòla bilingua o calandreta...

Adara qu’avetz resolvut aquera prumèra question, que podetz començar de redigir la letra de motivacion e lo CV.

 
 

E. Ciblar ua entrepresa

Pendent la vòsta recèrca d’emplec ne’vs devetz pas limitar a un cèrt nombre d’auhèrtas o a un biaish de cercar. Atau, cada dia qu’avetz de consultar las navèras auhèrtas e, d’un aute costat, de seleccionar entrepresas entà mandar hèra de candidaturas espontanèas.

La seleccion de l’entrepresa qu’ei ua etapa obligatòria, que va dens lo sens de l’individualizacion de la candidatura (véger fica tematica sus la candidatura espontanèa).

L’idea qu’ei de seleccionar las entrepresas a las quaus podetz prepausar ua mission qu’an besonh, e atau aver la sòrta de tiéner un rendètz-vos coma seguida de la letra e deu CV.

Adara que vam véger quin cau hèr entà assegurar ua bona seleccion de las entrepresas.

1. Los sectors d'activitat

Dus gran cas :

  • sia qu’avetz competéncias que’s pòden utilizar sonque dens un sector d’activitat.

  • sia qu’avetz competéncias que se pòden emplegar dens mantuns sectors d’activitat.

Plan segur se lo vòste mestièr ne se pòt pas sonque practicar au deguens d’un sector d’activitat, que vatz forçadament cercar dens aqueste sector.

S’avetz un mestièr qui poderem qualificar de transversau au nivèu deus sectors, que serà mei aisit entà vosautes de cercar prumèr dens las entrepresas deus sectors on tribalhatz ja.

Si n’avetz pas enqüèra d’experiéncias o que la lista deus sectors on avetz tribalhat ne permet pas de listar hèras entrepresas, qu’auretz de considerar los sectors on las vòstas experiéncias professionaus son transferiblas.

Entà hèr aquò que’vs basta d’anar sus sitis d’emplec e de cercar auhèrtas en foncion de las vòstas experiéncias e deus vòstes diplòmas, e d’espiar quinas son las entrepresas e sus quin sector. Atau que coneisheratz los sectors que’vs pòden interessar e podretz causir en foncion de critèris objectius (interès entà las vòstas competéncias tecnologicas dens un sector, condicions de tribalh....) e subjectius (interès divèrs, d’òrde familiau, ligat a l’ambient de tribalh dens un sector...).

2. Deu sector a l'entrepresa

Un còp qu’avetz listat e ordonat los sectors, qu’ei l’òra de ciblar las entrepresas de la vòsta zòna de prospeccion. Entà hèr aquò que cau trobar la lista de las entrepresas en foncion deu sector d’activitat. Aquera lista que la podretz hèr en emplegant un utís : lo Kompass. Qu’ei un libe que repren dens ua region administrativa totas las entrepresas en foncion deu sector e que presenta la lor produccion (que pòt pertocar mantuns sectors o mantuns produits), la talha, l’adreça. Plan segur ne hè pas necèra de’u crompar, lo Kompass qu’ei a la vòsta disponibilitat dens cada "Pôle Emploi”.

Un còp cibladas las entrepresas (dab l’ajuda deu Kompass, o de las "pages jaunes”), se la vòsta lista ei de las longas, que’vs va caler dar un òrde a aquera lista entà estar plan eficaç.

Entà açò, que’vs cau entresenhar sus aqueras entrepresas e, despuish, agir en foncion de critèris de dus tipes, critèris objectius e critèris subjectius.

Critèris objectius : Utilitat de las vòstas competéncias e coneishenças au deguens de l’entrepresa, utís emplegats dens l’entrepresa, condicions de tribalh, possibilitat d’aver un pòste equivalent a las vòstas experiéncias (un cadre experimentat qu’aurà mei l’escagença de trobar un emplec dens las granas entrepresas), possibilitat mei grana d’i trobar un prumèr emplec (sovent ua petita entrepresa qu’acceptarà mei un començaire), edat de l’entrepresa, estructuracion en servici (per mandar la vòsta candidatura...), evolucion de l’activitat (pas interès de hèr ua demanda dens ua entrepesa en plea crisi, necessitat de plan amuishar l’interès e per quauques pòstes l’evolucion deu mercat, de l’entrepresa e las determinantas d’aquera evolucion), coneishença d’ua persona au deguens de l’entrepresa que pòt ajudar la vòsta candidatura. Possibilitat de hèr carrièra dens l’entrepresa o lo grop...

Critèris subjectius : Produits, avantatges (salari, CE, prevedença ...), localizacion, ambient de tribalh, interès d’aver tribalhat dens aquera entrepresa per la seguida de la carrièra ...

Plan segur un còp seleccionada ua entrepresa, que podetz pensar que los sués concurrents sus la vòsta zòna de recèrca d’emplec seràn de bon contactar eths tanben.

Ua darrèra remarca : quan contactatz ua entrepresa, que’vs cau totun perseguir las vòstas recèrcas d’emplec, contunhar de mandar candidaturas espontanèas e de respóner a auhèrtas d’emplecs.

Que’vs cau tanben organizar un drin lo seguit de la vòstas candidaturas au-près de las entrepresas. Alavetz, que podetz hèr un tablèu dab lo nom de cada entrepresa que contactètz, la data deu contacte e se avetz avut ua responsa o non.

 

F. Causir ua auherta d'emplec

1. Trobar ua anóncia d'emplec

De mei en mei, Internet qu’ei lo supòrt privilegiat entà cercar auhèrtas d’emplecs. Sus Internet se pòt aisidament trobar sitis generalistas en matèria d’emplecs (coma Pôle Emploi (ex ANPE), sitis especializats (Emploi Cadre, la Gazette des Communes, lo Servici de l’Emplec), sitis consacrats a l’emplec suu parçan (sudouestjob), sitis de jornaus (dab la preséncia de las loas auhèrtas), e sitis d’entrepresas dab un recanton ressorsas umanas que presenta sovent las auhèrtas d’emplecs e las possibilitats de hèr carrièras au deguens deu grop. Atau qu’ei possible de dedicà’s a la recèrca d’anóncias gràcias a Internet.

2. Las rubricas au deguens d'ua anóncia

  • Sovent ua anóncia contien entresenhas sus l'entrepresa que recruta (nom, contacte, sector d'activitat, comunicacion...), mes pas tostemps. Quan n'ei pas lo cas i a tostemps lo contacte de l'entrepresa encargada de miar lo recrutament. Plan segur còps que i a, sus ua anóncia de l'ANPE o d'ua agéncia d'emplec en interim que podetz devinhar l'identitat de l'entrepresa que recruta. Dens aqueste cas que'vs cau mandar duas candidaturas ua de cap a l'intermediari e l'auta coma se responètz "dirèctament” a l'auhèrta de l'entrepresa.

  • Entresenhas suu perhiu deu candidat cercat.

  • Entresenhas suu pòste de tribalh prepausat.

  • Lo contacte o la manèra de contactar entà postular.

3. Analisar las espèras de l'emplegaire

Dens l'anóncia que'vs va caler identificar las espèras de l'emplegaire e classar-las dab los tres tipes de critèris que segueishen :

  • Critèris obligatòris : plan segur parlam aquiu d'ua competéncia o d'un diplòma shens lo quau n'ei pas possible de tiéner aqueste pòste de tribalh. Ua competéncia relativa a "la mission principau”.

Per exemple : si un cabinet comptable que demanda un comptable que sàpia hèr la comptabilitat sus lo logiciau Ciel, ne serveish pas ad arren de postular si n'ac sabetz pas hèr.

  • Critèris de personalitat : sovent que son las espèras relativas a la persona de recrutar, que deuretz probar qu'avetz aqueras qualitats gràcias a la letra de motivacion, e a l'entervista.

Per exemple : lo dinamisme, lo tribalh en còlha, lo gost deu contacte...

  • Critèris desirats : aquiu, los critèris de causida ne son pas ligats a la possibilitat de tiéner lo pòste de tribalh, mes, meilèu a la faiçon d'ocupar lo pòste. L'entrepresa balha la soas preferéncias.

Per exemple : la mestresa de l'espanhòu, qu'ei un critèri imperatiu entà ua secretària bilingua francés-espanhòu, mes qu'ei un critèri segondari dens ua anóncia dens la quau la mestresa de l'espanhòu ei demandada shens estar lo mei important. Per exemple un servidor dens ua zòna toristica que compren e parla lo minimum poderà postular shens aver ua mestresa totau.

4. Quin hèr entà causir ua anóncia ?

  • Plan seleccionar los supòrts, en foncion deus sectors d'activitat : portau generalista, portau especializat, emplegar motors de recèrca (Monster, Kel job)... e ne pas se limitar a un siti, que cau combinar tot çò qu'ei interessant.

  • Que cau plan léger totas las auhèrtas d'emplec que pertòcan lo vòste mestièr, quitament las mei cortas (hèras entrepresas ne son pas acostumadas a recrutar, mes aquò ne vòu pas díser que n'ei pas interessant d'i tribalhar) e las mei ancianas (sovent se demora l'anóncia qu'ei pr'amor que lo pòste ei enqüèra liure).

  • Que cau respóner lo mei lèu possible.

  • Plan véger dens çò qui ei exigit çò que's pòt compensar o non : véger çò qu'ei exigit e çò qu'ei desirat peu recrutaire.

Per exemple : per ua auhèrta on se demanda un pòste de VRP confirmat dab un diplòma de bac + 2 en venta, quauqu'un qui n' a pas d'experiéncia ne deu pas presentà's, mes quauqu'un qui a ua experiéncia de dus ans e lo diplòma o quauqu'un qui tribalha sus un pòste comparable despuish mei de 5 ans e pòden postular.
Plan analisar cada anóncia entà véger çò qu'ei imperatiu, desirat, e en foncion d'aquò bastir un argumentari entà respóner, se cau respóner.

Totas las etapas de seguir que las vatz hèr en foncion de l'analisa de l'anóncia : lo CV deu amuishar que posseditz tot çò qu'ei imperatiu tà tribalhar suu pòste de tribalh.

La letra de motivacion deu amuishar que dab la vòsta enveja responeratz a çò qu'espèra l'emplegaire (critèris relatius a la personalitat)

Dens l'entrevista d'emplec que devetz poder muishar qu'avetz las competéncias e la personalitat qu'interèssa l'entrepresa, e se n'avetz pas totas las quitas caracteristicas deu perhiu ideau, amuisharatz que podetz compensar (competéncias, estudis, saber-estar, saber-hèr)

  • Cercar entre-senhas si'vs semblatz que mancan informacions dens l'anóncia : pòste, servici, contacte... per saber si l'auhèrta e'vs correspon plan.

G. Analisar lo sué perhiu

Entà que la vòsta recèrca d’emplec sia ua escajuda, que’vs cau prumèr préner lo temps de plan analisar lo vòste perhiu. Aquera analisi que’vs permeterà apuish de hèr responsas adaptadas e argumentadas per cada auhèrta.

Lo vòste perhiu professionau que's compausa de :

1. Las vòstas coneishenças escolaras

  • los vòstes diplòmas

  • los vòstes certificats (DU de lengas....)

  • las matèrias qu'avetz apresas

  • los utís qu'avetz utilizat (logiciaus, maquinas...) Entà respóner a ua exigéncia d'ua entrepresa en la matèria, l'atestacion se hè aisidament e hèra objectivament dab la possession d'un diplòma (visible tanben suu CV). 

2. Las vòstas competéncias

  • qu'ei a díser, tot çò qu'avetz aprés e practicat suu pòste de tribalh (que sia en CDI, CDD, interim o au parrat d'un estagi). Per plan comunicar que'vs cau definir totas las vòstas competéncias dab a cada còp :

    • un vèrbe d'accion,

    • ua quantificacion o/e l'usatge d'un utís. Per exemple : gestionari d'un servici Ressorsas Umanas de 50 personas. Tiéner la comptabilitat sus Ciel Compta.

3. Sabers-hèr exteriors a las vòsta competéncias

Aquiu que cau considerar tot çò que sabetz e çò qu'ètz capable de hèr shens l'aver aprés a l'escòla o au tribalh. Que son sabers que podetz aver gràcias aus vòstes centres d'interès, a la vòsta familha... Entà plan compréner aquestes sabers-hèr que'vs cau ensajar de definir-los de la medeisha manièra que las vòstas competéncias. Ex : Coneishença de l'occitan, permés de miar... 

4. Qualitats personaus

Prumèr que'vs cau hèr ua lista de las qualitats que pensatz aver e que pòden interessar un emplegaire, tot en sabent que n'i pas d'interès de bastir la lista la mei completa deu mond (au contrari, la modestia tanben qu'ei ua qualitat) mes que las ve calerà totas poder justificar dab situacions en las quaus avetz usat aqueras qualitats.

A mesura que vatz respóner a las auhèrtas que completaratz lo vòste perhiu, çò que'vs permeterà d'aver responsas de qualitat a las auhèrtas dab ua eficacitat mei grana gràcias a un argumentari plan mestrejat.

Atau com lo podetz véger mei en la fica sus la causida de l'auhèrta, dens ua auhèrta d'emplec l'entrepresa hè dus tipes de demandas : las exigéncias e los vòts.

Que cau plan identificar los dus e saber que la màger part deu temps las exigéncias que son ligadas a las vòstas competéncias, las vòstas coneishenças universitàrias, benlèu los vòstes sabers-hèr e donc que'vs calerà argumentar en foncion.

Tanben, los vòts deus emplegaires pòrtan sovent sus qualitats personaus o sus sabers- hèr (que calerà tanben presentar e argumentar en foncion, atau com l'avem presentat).

Avisatz-ve que a cada auhèrta correspon ua analisi e donc ua presentacion deu vòste perhiu en adequacion, alavetz, ne cau pas jamei respóner dab ua responsa tipe que vatz mandar a tot lo mond o per ua responsa de tipe "annuari” qu'ei a díser dab lo descriptiu sancer deu vòste perhiu e on seré au recrutaire d'anar cercar las informacions.

La responsa a ua auhèrta qu'ei un tribalh de comunicacion e deu donc hèr passar un messatge deus clars e eficaç.

 
 

Per tota question relativa al contengut del site, a la publicacion d'ofèrtas, contactatz-nos per mail :

contact@emplec.com

Servici de l'Emplec
Institut d'Estudis Occitans
11 carrièra Malcosinat
31000 Tolosa