EMBAUCHAR
Un còp lo candidat causit, qualas son las demarchas legalas per notificar una embaucha ? Aquí una rubrica per desbartassar lo contracte de trabalh, la declaracion unenca d'embaucha e autre registre del personal.
A. Lo registre unic deu personau
A. Lo registre unic deu personau
A l’excepcion deus particulars emplegaires e de las associacions qu’emplegan per l’intermediari deu chèc emplec ; tots los emplegaires que deven assegurar la tenguda d’un registre deu personau entà l’ensem deus sués salariats.
1. Las obligacions
Las seguentas mencions que deven càber dens lo registre unic deu personau :
-
nom e petit nom.
-
nacionalitat,
-
date de naishença,
-
sèxe,
-
emplec,
-
qualificacion,
-
dates d’entrada e de sortida de l’establiment.
En cas d'emplegats a contracte especifics que calerà indicar tanben lo tipe d'emplec (CDD, aprentís o tribalh temporau). Se un salariat càmbia de tipa de contracte que calerà a cada còp tornar enregistrar lo navèth contrat.
Entà un salariat estrangèr sosmés a la possession d'un títol autorizant l'exercici d'ua activitat salariada, l'emplegaire aurà de mencionar lo tipe de document e lo numèro d'aqueste document.
L'obligacion de tenguda deu registre unic deu personau que s'aplica a cada establiment.
Se au parat d'un contròle, l'emplegat ne pòt pas presentar un registre complet e shens errors, ua sancion de 750 € ei possible.
2. La forma deu registre unic deu personau
N'existeish pas cap d'obligacion de forma que sia au nivèu de la presentacion o au nivèu deu supòrt (papèr, informatic, los dus...).
Totun, lo tablèu sembla ua forma plan adaptada a la tenguda deu registre. Que podetz aisidament elaborar un tablèu dab :
-
en linha : los emplegats (nom e petit nom)
-
en colonas : las autas mencions obligatòrias (véger la lista çai-dessús)
B. La Declaracion Unica d'Embaucha (DUE)
La Declaracion Unica d’Embaucha (DUE) qu’ei obligatòria a l’escadença de l’embaucha d’un salariat. Qu’ei un formulari unenc qui regropa totas las formalitats.
Entà efectuar aquera DUE , l'emplegaire que deu contactar l’URSSAF competent respècte au sué establiment o procedir sus internet : www.due.fr. En seguida d'acò, l'URSSAF que s'encargarà de comunicar las informacions aus organismes e a las administracions concernidas.
La DUE que concerneish tot los emplegats a l'excepcion de quauques tipes d'emplec : particulars qu'emplegan ua persona a casa, e las entrepresas qu'emplegan dab lo dispositiu seguent : "Titre Emploi-Service Entreprise (TESE)”. Dens aqueste cas dispositius especiaus que son prevists (a véger en contactar l'URSSAF).
1. La D.U.E. dona lo dret aus emplegats de profitar de l'ensem deus sués drets sociaus e d'estar cobèrts en cas d’accident deu tribalh.
La DUE que permet d'establir a l'encòp :
-
La declaracion preliminara a l'embaucha,
-
La declaracion de prumèra embaucha dens un establiment,
-
La demanda de matriculacion d'un salariat au regime generau de la securitat sociau,
-
La demanda d'afiliacion au regime de l'assegurança caumatge,
-
La demanda d'adesion au servici de santat au tribalh,
-
La declaracion d'embaucha deu salariat de cap au servici de santat au tribalh dens l'amira de la visita medicau d’embaucha obligatòria,
-
La lista de salariats embauchats peu pre-establiment de la declaracion anadèras de dadas sociau (DADS).
N.B. : Se n'avetz pas jamai avut un salariat per abans, la prumèra DUE servirà entà vos aviar un compte emplegaire a l'URSSAF.
C. Dar conget a un salariat
La ruptura deu contracte de tribalh qu’ei quauquarren de plan encadrat peu còdi deu tribalh (dens un sens com dens l’aute). Entà tractar deu conget d’un emplegat que cau plan hèr la diferéncia entre dus concèptes opausats : d’ua part lo conget per motiu personau e de l’aute lo conget per motiu economic.
1. Lo conget per motiu personau
Dens aqueste cas, qu'ei l'emplegaire qui desira acabar lo contracte de tribalh pr'amor de rasons ligadas a la personalitat deu sué salariat.
Aqueras rasons que caben dens aqueras categorias :
-
La fauta deu salariat (insufiséncia professionau, conget per rason disciplinària...)
-
La malautia (dens lo cas de recajudas vertadèras e negativas per l'entrepresa)
-
Meishants ligams dab los collègas (Sonque dens lo cas de recajudas vertadèras e negativas entà l'entrepresa).
Totas las fautas ne permeten pas de justificar d'un conget. Qu'existeish quate tipes de fautas que desbocan sus efèits juridics diferents :
-
La fauta leugèra : (exemple : retard ponctuau, un error de caisha...) n'ei pas de natura a provocar un conget. Totun, que pòt legitimar un avertiment.
-
La fauta simpla : (exemple : retard sistematic, errors a repeticions) d'ua part, aquera fauta permet a l'emplegaire de dar conget au salariat. D'auta part, que dèisha la possibilitat a l'emplegat de hèr lo sué preavís e mes tard de tocar las suas indemnitats entaus congets e las vacanças degudas.
-
La fauta grèva : n'existeish pas nada definicion d'aquera fauta, totun la jurisprudéncia considèra qu'ua fauta ei grèva quan la quita preséncia deu salariat provòca un risc dens l'entrepresa : insultas, incompeténcia sus un pòste a risc, arrefús d'aubedir ... Aquera fauta ne da pas dret ni a indemnitats de congets, ni a tribalhar la durada deu preavís (o a estar indemnizat deu preavís) mès que dèisha lo dret a l'emplegat de tocar l'indemnizacion ligada a las suas vacanças.
-
La fauta "pesuga” : qu'ei ua fauta qui's caracteriza per l'intencionalitat de portar tòrt a l'entrepresa. Aquiu l'emplegaire qu'a lo dret de portar l'ahèr a la coneishença deu tribunau d'instància e hèr jogar la responsabilitat civila deu salariat. Tanben, l'emplegat ne gaudirà pas de nat dret (pas cap preavís o indemnitat de preavís, pas nada indemnitat de conget, pas nada indemnitat ligadas a las vacanças). La fauta "pesuga” qu'ei la sola que permet de dar conget a un emplegat grevista.
Entà que sia valable lo conget per motiu personau, l'emplegaire que deu seguir aquera procedura :
-
Mandar ua letra recomandada o de la man a la man entà convocar lo salariat (las rubricas seguentas que deven càber dens la letra : lo motiu de l'entrevista, la possibilitat d'estar representat, la data, l'òra,lo lòc, en cas de congets per fauta deu salariat, la letra deu arribar dens los deus mes aprés la fauta).
-
Entrevista : convocar l'emplegat entà li indicar lo motiu deu conget.
-
Mandadís d'ua letra recomandada dab avis de recepcion : dens lo mes que segueish l'entrevista e dab l'enonciacion deus motius deu conget.
2. Lo conget per motiu economic
Dens aquera categoria que caben los congets deguts a la meishanta santat economica d'ua entrepresa mes tanben a tota reorganizacion de la produccion.
N.B. : Que cau plan compréner qu'ua reorganizacion que cèrca a aumentar la competitivitat de l'entrepresa (quan seré ua entrepresa hàcia beneficis) pòt constituir la basa d'un conget per rason economica.
Segon que l'entrepresa dona conget a un salariat o a mantuns, la procedura entà dar conget ei diferenta :
-
Procedura entà dar un conget a ua persona :
-
mandar ua letra recomandada o de la man a la man entà convocar lo salariat, entrevista preliminara (lo salariat que pòt estar assistit),
-
mandadís d'ua letra recomandada dab avís de recepcion (au mensh 7 dias après l'entrevista e pas abans 15 dias per un cadre).
-
-
Procedura entà dar un conget a mantuas personas :
-
consultacion deus representants deu personau,
-
mandar ua letra recomandada o de la man a la man entà convocar los salariats,
-
entrevista preliminara (lo salariat que pòt estar assistit), entà cada salariat
-
mandadís d'ua letra recomandada dab acusat de recepcion (au mensh 7 dias après l'entrevista e pas abans 15 dias per un cadre).
-
Aquera procedura qu'ei modificada quan mes de 50 personas son destituidas.
D. Redigir un contract de tribalh
Lo contract de tribalh qu’ei ua convencion de dret privat que crea un ligam de subordinacion juridic entre emplegaire e emplegat. La redaccion deu contract de tribalh qu’ei mes qu’ua formalitat administrativa, la cau plan pensar pr’amor lo contrat de tribalh que descriu las obligacions mutuaus qu’existeishen entre lo salariat d’ua part e l’emplegaire d’aute part.
Lo contract de tribalh qu'a vocacion a encadrar las relacions emplegat-emplegaire. Atau que permet de previéner e de dar ua responsa en cas de problèmas au parat de l'execucion deu contract de tribalh. En particular, aqueste contract que deu descríver lo contienut de las missions deu salariat, lo sué encadrament (lo gra d'autonomia) e la sua remuneracion.
En cas de problèma ligat a l'execucion deu contract de tribalh portat a la coneishença de la juridiccion deus "prud'hommes”, tostemps lo jutge s'apuejarà sus ua analisi deu contract de tribalh e ua confrontacion aus hèits entà dar la sua senténcia.
1. Lo contienut deu contract de tribalh
Totas las dadas seguentas que deven càber au deguens deu contract de tribalh :
-
La foncion qu'ocuparà l'emplegat e la sua qualificacion professionau
-
La remuneracion (salari e primas de totas menas). En cas d'aplicacion de convencion collectiva o d'acòrd d'entrepresa la remuneracion mes favorabla au salariat que deu estar aplicada. De tota manèra, lo salari que deurà tostemps estar superior au SMIC. En cas d'aplicacion d'ua convencion collectiva, lo salari depenerà dirèctament de l'aplicacion d'un barèma (cada emplec corresponerà a ua categoria que deu estar mencionada dens lo contract de tribalh, adès que bastarà de multiplicar los punts que correspónen a la categoria per la valor deu punt entà aver lo salari brut).
-
La durada deu contract : shens aquera estipulacion lo contract qu'ei considerat con un contract a durada indeterminada. Avisatz-vs, un contract de tribalh a durada determinada ne pòt pas perméter de prevesir durablament un emplec ligat a l'activitat normau e permanenta de l’entrepresa.
-
L'intensitat orària setmanèra : shens aquera estipulacion lo contract qu'ei considerat com un contract a temps plen (35 òras ebdomadàrias).
-
Lo delai de preavís en cas de demission (sovent integrat a la convencion collectiva, senon qu'ac cau precisar).
-
La convencion collectiva aplicada.
-
Lo lòc de tribalh.
A la signatura deu contract la convencion collectiva e l'acòrd d'entrepresa que deven estar presentadas a l'emplegat.
Atau lo contract de tribalh que pòt estar un document pro-brac que cita la convencion collectiva aplicabla per plan encadrar lo contract de tribalh. Totun lo contract de tribalh que pòt contiéner clausas especificas.
2. Las clausas especificas
Entà ajuda'vs trobaratz mantuns exemple sus internet entà redigir un contract de tribalh.
-
Lo periòde d'ensai : còps que i a, aqueste periòd qu'ei present au deguens de la convencion, senon, lo contract de tribalh que pòt contiéner ua clausa que limita dens lo temps lo periòde d'ensai (pendent lo quau l'emplegaire e l'emplegat poden quan vòlen e shens justificacion acabar dab lo contract de tribalh).
-
Dens l'abséncia de convencion, sovent lo contract que prevei un periòde d'ensai que va de quauques dias entà un emplegat pòc qualificat dinc a tres mes entà un cadre.
-
La clausa de non-concurréncia : l'emplegat que s'engatja a non pas tribalhar per ua entrepresa deu medish sector economic pendent un temps limitat après la ruptura deu contract de tribalh (la preséncia de la clausa de non-concurréncia justifica d'ua contrapartida financèra).
-
La clausa de mobilitat : en signant-la l'emplegat s'engatja a acceptar ua mudason. Alavetz, un arrefús seré un motiu de ruptura deu contract de tribalh par la sua fauta.
