L'ESTAGI
Ont postular e cossí trobar un estagi en complement de sa formacion... Tot serà dins aquesta rubrica
A. L'encastre juridic deus estagis
A. L'encastre juridic deus estagis
Adara, abans de hèr un estagi en entrepresa un estudiant (o un escolan) que deu tostemps demandar prumèr ua convencion d’estagi auprès deu sué establiment (la màger part deu temps au servici deus estagis).
1. La convencion d’estagi obligatòria
La convencion relativa a l’estagi qu’ei ua convencion tripartita que liga :
-
l’estudiant (o escolan),
-
l’establiment escolar,
-
l’entrepresa. Aquera convencion qu’aurà de dar un encastre juridic a la preséncia de l’escolan au deguens de l’entrepresa, e que deu definir çò de màger : condicions de tribalh, durada de tribalh e remuneracion (en cas de remuneracion).
La convencion que deu obligatòriament contiéner las rubricas que segueishen :
-
Definicion de la mission
-
Temps de tribalh e repaus
-
Data d’aviada e de fin de la convencion,
-
Regime de proteccion sociau (e obligacion tà l’estagiari d’estar assegurat au nivèu de la responsabilitat civila),
-
Condicion d’encadrament que sia dens l’entrepresa (obligacion d’aver un tutor) o a l’universitat (un professor encargat de seguir aqueth estagi),
-
Condicion de validacion de l’estagi entà l’obtencion deu diplòma e l’obligacion de dar ua atestacion de fin d’estagi,
-
Las clausas deu reglament interior aplicablas a l’estagiari,
-
Lo nivèu de remuneracion e las modalitats de pagament (dab la possibilitat de listar los autes avantatges).
2. La durada de l’estagi :
La durada de l’estagi ne pòt pas passar los 6 mes, renovelaments inclús. Aqueth limit n’a pas de s’aplicar en cas d’estagi en entrepresa integrat a un cursus (obligatòri entà aver lo diplòma, necessitat de gardar l’estatut d’estudiant, necessitat d’ua convencion tripartita, pas de salari mes ua gratificacion obligatòria un còp passat los 6 mes).
3. La gratificacion :
L’estagiari que deu profieitar d’ua remuneracion obligatòria quan lo periòde d’estagi passa los 3 mes. Per manca d’acòrd collectiu o de branca aquera gratificacion qu’ei fixada a 398,13 € (entà l’annada 2009).
Aquera gratificacion de l’estagiari qu’ei deguda un còp hèit lo prumèr dia d’estagi e que deu estar pagada mensuaument.
4. Las cotizacions sociaus :
Tant que la gratificacion ne passa pas los 398,13 € l’entrepresa qu’ei exonerada de cotizacions sociaus. Las cotizacions concerneishen sonque la part que passa los 398,13 €.
5. Responsabilitat e proteccion sociau :
Mentre qu’ei en estagi l’estudiant guarda lo sué estatut d’estudiant. Las repercussions son las seguentas :
-
Lo sué regime de securitat sociau ne càmbia pas,
-
En cas d’accident subit qu’ei assegurat per l’assegurança de l’establiment escolar.
L’estagiari que deu estar assegurat au títol de la responsabilitat civila se per cas ei a l’origina d’un accident dens l’encastre deu son estagi.
B. Cercar un estagi
Entà cercar un estagi qu’ei important de considerar dus aspèctes : la prospeccion o recèrca d’auhèrta, las règlas ligadas a la fòrma. Atau que vam purmèr tractar de la faiçon de cercar ua auhèrta o ua entrepresa qui posca estar interessada, puish, que poderam passar a las règlas de seguir entà postular auprès d’ua entrepresa.
Quin trobar un estagi ?
Que podetz cercar entremiei las auhèrtas d'estagis, notadament sus Internet gràcias a mantuns sitis especializats :
-
letudiant.fr
-
apec.fr
-
kelstage....
Podretz tanben consultar los sitis d'entrepresas a las loras rubricas ressorsas umanas o los sitis de las universitats o escòlas. Que podetz tanben cercar entremiei las auhèrtas d'emplecs e perpausar los vòstes servicis au-près d'entrepresas que'n son a publicar auhèrtas d'emplecs entaus començants (dab l'avantatge d'aver, per l'enterpresa, la possibilitat d'usar lo vòste periòde d'estagi com un gran ensai, pr'amor l'estagi que pòt estar ua bona escagença de's hèr remarcar dens ua entrepresa).
Qu'avetz la possibilitat de consultar los archius de la vòsta formacion entà véger on los ancians hasèn las luas practicas, dens quinas entrepresas e dab quinas missions. Tot aquò qu'ac podratz trobar en consultant los memòris de las ancianas promocions. Quan seré entà un estagi qu'auretz la possibilitat procedir gràcias a candidaturas espontanèas (entà aver mei d'entre-senhas, referitz-vos a la fica tematica sus la candidatura espontanèa).
Las règlas de fòrmas :
Dens la vòsta recèrca d'estagi qu'auretz de hèr atau com s'estóssetz, tà de bon, a postular entà obtiéner un emplec.
Sovent, los entreprenaires qu'esitan a arcuélher estagiaris pr'amor qu'an paur d'estar confrontats a ua persona dab pòc d'autonomia e que demanda hèra temps entà enquadrar-la dens la sua mission.
Que'vs cau donc amuishar la vòsta eficacitat e lo vòste professionalisme dens la vòste recèrca, atau que rasseguratz los possibles recrutaires.
Entà seguir las nòrmas, que'vs vatz conformar a las exigéncias classicas d'ua recèrca d'emplec :
-
Lo CV : que vatz hèr un CV adaptat a la vòsta demanda, en hèr paréisher las vòstas coneishenças entà ocupar ua tau mission. Que devetz desvolopar las vòstas competéncias ligadas au pòste atau com la mestresa de logiciaus, de lengas... Plan segur s'ètz enqüèra estudiant ne podetz pas aver ua vertadèra experiéncia, n'auretz pas sonque de detalhar las experiéncias en ligason dab l'estagi. Tà çò d'aute que basta de listar las experiéncias, las entrepresas e los periòdes (sonque tà amuishar la vòsta volontat e lo vòste dinamisme). Entà mei d'entre-senhas, referitz-vos a la fica tematica sus lo CV.
-
La letra de motivacion : plan segur lo gran argument de la letra de motivacion ne pòt pas estar "que soi en recèrca d'un estagi entà validar l'annada escolara”. Aquera informacion que pòt estar dens la prumèra frasa entà presentar lo contèxte, per exemple : "actuaument en quatau annada de ... que'n soi a cercar un estagi entà méter en òbra las mias coneishenças sus un pòste de...” atau l'informacion qu'ei dada d'un biaish mes positiu. Cau absoludament emplegar pas lo mot obligatòri, quan seré entà un estagi obligatòri entà ne pas dar l'impression d'i anar pr'amor que cau. Puish qu'auretz de plan amuishar lo vòste interès shens jamei mencionar que que sia de negatiu relatiu a la vòsta candidatura. Entà mei d'entre-senhas, referitz-vos a la fica tematica sus la letra de motivacion).
Per acabar qu'auretz tanben de preparar la vòsta entrevista atau coma s'estosse entà ua entrevista d'emplec, e entà hèr aquò vos poderatz referir a las ficas tematicas que pertòcan l'entrevista d'emplec (conselhs entà passar ua entrevista d'emplec e preparar l'argumentacion de l'entrevista d'emplec).
