RECRUTAR
Redigir una ofèrta d'emplec, la difusar, far passar las entrevistas d'embaucha e enfin causir al final : tot aquò pòt semblar un percors pro long. Tanben listam aquí remarcas e conselhs per èstre lo mai eficaç possible.
A. Seleccionar las candidaturas
Un còp recebuts los CV e las letras de motivacion, ua de las etapas mes importanta qu’ei la causida de las candidaturas. Aquiu, l’enjòc qu’ei de triar d’ua faiçon eficaça las candidaturas.
D'ua part, ne cau pas recéber tròp de mond, se que no prenem lo risc de's mesclar los candidats, e pèrder un hèish d'energia e de concentracion dens la recepcion deus candidats "pòcs interessants”. D'aute part, que cau avisà's de ne mancar pas "lo” candidat interessant.
1. Triar las candidaturas en foncion de critèris objectius.
Plan segur ne cau pas deishà's anar a espiar cada CV e cada letra de motivacion e hèr duas pialas de candidaturas (las retengudas e las autas) en foncion d'ua intuïcion globau sus cada candidatura.
Que cau absoludament sortir de l'esfèra deu sentit, de l'intuïtiu e deu subjectiu entà entrar dens ua analisa basada sus critèris objectius.
2. Triar segon las exigéncias deu pòste.
Lo recrutaire qu'a de tornar pensar a la sua auhèrta d'emplec e au sué pòste de tribalh entà classar las competéncias, coneishenças, experiéncias e qualitats segon que sian exigidas (shens la-quau n'ei pas possible de tiéner aqueste pòste de tribalh) o desiradas.
Un còp hèita aquera classificacion que cau bastir un tablèu que repren en colona los candidats e en linha las exigéncias.
Per exemple entà un poste d'animator-professor en occitan dab tres exigéncias (licéncia d'occitan, permís de miar e coneishenças en musica e cant occitan) e 9 candidats, que bastiratz lo tablèu seguent :
Dens aqueste cas, qu'èi plan aisit d'organizar la seccion de recrutament. Los candidats 2,3,8 e 9 que seràn convidats a ua entrevista d'emplec.
3. Quin continua la tria (se tròp de personas respónen a las exigéncias) ?
Per contre, dens lo cas que tròp de candidat emplenan los critèris obligatòris, vos calerà demandar, en foncion de la capacitat de l'estructura, quantas personas e podetz entrevistar ; puish establir un navèth tablèu dab tots los vòts de l'emplegaire.
Un còp hèit aqueste tablèu vos demorarà sonque de comptar las crotz per cada candidat e de convocar lo X prumèrs.
B. Menar una entrevista
En mai de cercar a saber mai de precisions sul perfil d’un candidat a partir d’un CV o d’una letra de motivacion, l’enjòc d’un entreten es d’arribar a crear en un res de temps e amb una persona sovent desconeguda, un ligam pro fòrt per poder escambiar rapidament sus las causas que jutjatz essencialas.
Tornar legir los CV e letras de motivacion abans l'entrevista
Anotatz los CV per metre en evidéncia las precisions que demandaretz a la persona. Serà totjorn mai aisit e mai rassegurant per la persona que postula de parlar de son experiéncia a partir de questions vòstras que non pas a partir de res. Quitament se sus d'unes punts del CV vos pareisson sens equivòca, pensatz que pòt èstre interessant de demandar una reformulacion al candidat (« avètz fait aquò, me ne podètz dire mai ? ») que vos farà entreveire sa vision personala de tala o tala experiéncia o formacion que serà totjorn mai detalhada.
Es plan important d'aculhir calorosament lo candidat per lo metre d'aise
Un candidat d'aise se revelarà mai aisidament (tant los defauts coma las qualitats). Es pas perça que un candidat es un pauc timid lo jorn de l'entreten que aurà pas l'energia e l'implicacion que recercatz pel pòste. De mai un candidat en fisança sortirà fisançòs d'aquel entreten : òm s'es interessat a el pas sonque d'un biais superficial. Aital gardarà un bon imatge de l'entrepresa quitament s'es pas retengut. La mesa en fisança passa per l'explicacion de cossí entendètz far se debanar aquel entreten.
Se presentar e presentar l'entrepresa o l'associacion
Lo vòstre ròtle aquí dedins.
Escambis a l'entorn del CV
Far precisar d'unes punts que vos semblan necessaris e lo far extrapolar : Ex : amb aquela experiéncia/formacion cossí menaretz tala o tala tasca. Aital a mesura, presentaretz lo pòste mai en precision. Atencion çaquelà a pas donar tròp de detalhs pr'amor senon lo candidat cercarà naturalament a « pegar » son discors al vòstre nivèl d'exigéncia ; çò que vos donarà un imatge fals d'el.
Questionar sul contengut de l'emplec
Per èstre segur que tot lo mond parle plan de la meteissa causa e aital sortir dos o tres axes principals que permetràn de pausar de questions del tipe "mesa en situacion" e sortir del discors teoric deu cv e de la LM. Vos permet aital de testar la capacitat de reaccion e la possibla adaptacion del candidat a çò que seràn las problematicas del poste de tribalh.
Daissar un moment per las questions del candidat
Conclusion de l'entreten
En explicant cossí e dins quin delai se passarà la seguida de las decisions.
Pendent aquel entreten, los professionals de las ressorsas umanas an sovent de questions prefaitas que pausan per avalorar diferentas causas : maturitat e equilibre professional, logica de rasonament, energia, capacitat d'engatjament dins lo pòste, relacional, capacitat d'organizacion, capacitat de reaccion fàcia a l'imprevist. Vos podètz inspirar d'aqueles axes per fargar vòstras pròpias questions o per vos donar un vejaire final al moment de causir lo candidat definitiu.
C. L'oferta d'emplec
Per redigir una ofèrta d’emplec, vos cal saber que d’unas entresenhas devon figurar obligatòriament dins aquela ofèrta. Los formularis de depaus d’ofèrtas del servici de l’emplec seguisson aquelas obligacions.
Mas devètz saber tanben que d'unes contenguts son enebits :
-
la discriminacion basada sul sèxe e l'atge,
-
la discriminacion basada sus la situacion familiala,
-
la discriminacion basada sus l'origina,
-
la discriminacion basada sus las conviccions politicas o religiosas,
-
la discriminacion basada sus las orientacions sexualas,
-
la discriminacion basada sus l'estat de santat o d'andicap
-
la discriminacion basada sus l'aparéncia fisica.
Per mai de precisions, lo Pole Emploi prepausa un guide practic per publicar una ofèrta d'emplec sus Internet. Se cercatz mai d'entresenhas sus la redaccion e la difusion de las ofèrtas d'emplec, gaitatz l'article correspondent del còde del trabalh.
1. Postar una ofèrta sul Servici de l'Emplec
Se volètz que la vòstra ofèrta d'emplec figure sul site www.emplec.com, podètz siá
-
emplenar lo formulari en linha o per corrièl (contact@emplec.com)
-
mandar per corrièr un descriptiu de l'ofèrta correspondent als diferents camps prepausats dins lo formulari en linha o per telefona (Servici de l'emplec (IEO) 11 carrièra Malcosinat 31000 Tolosa)
2. Difusar la vòstra anóncia endacòm mai
Del melhor serà organizada e diversificada la difusion, del mai podretz tocar de candidats amb un perfil interessant. Lo boca a aurelha fonciona plan per las ofèrtas d'emplec que demandan de saber l'occitan. Mas s'i cal pas limitar, que riscatz de pas aver pro de candidats e doncas far una causida per defaut, siá quitament de pas aver de candidats brica.
-
Sus Internet, plan de sites son dedicats a la recèrca d'emplec. I podretz postar la vòstra anóncia d'un biais similar al Servici de l'Emplec : RegionsJob.com/Emploi, monster.fr, pole-emploi.fr, Cadremploi.fr... Mas www.emplec.com es lo sol servici a metre en valor l'occitan coma critèri de recèrca, e a centralizar totas las anóncias.
-
Dins la premsa escrita : plan sovent, far paréisser una ofèrta d'emplec dins la premsa escrita es un servici pagant mas que pòt permetre de tocar un public especific. Lo còst de parucion es plan variable en foncion del relarg de difusion del jornal. A vos de mesurar l'impact que volètz donar a la vòstra ofèrta per trobar la pèrla rara. Pensatz plan que la premsa en lenga occitana coma la Setmana vos va permetre de tocar de monde que an l'occitan coma competéncia. Se cercatz qualqu'un de mai especializat dins l'accion culturala per exemple, las rubricas d'emplec de las revistas coma Telerama permetràn de tocar aquelas personas, mas en sabent que i aurà mens de chança per que sàpian l'occitan.
-
A la radio : Entre las radios a dominanta occitana e las emissions ponctualas en occitan, la radio es un bon mejan de far saber que se cerca a recrutar qualqu'un. Plan d'emissions fan lo torn de l'actualitat occitana doncas serián un bon relai d'informacion. Una lista de las radios que fan d'occitan es establida amb los contactes sus www.paginas-occitanas.com.
-
Endacòm mai : A mesura de son existéncia, lo Servici de l'Emplec va espandre sa difusion de las ofèrtas en defòra de son sol site internet. Dins l'espèra de diferents partenariats, lo Pole emploi demòra un incontornable per depausar son oferta, puèi son los endrets de formacion ont se tròban de monde que son a mand d'arribar sul mercat del trabalh amb lor competéncia nòva : facultats, licèus, grandas escòlas, centres de formacion, centres d'informacion regionals.
