Per tota question relativa al contengut del site, a la publicacion d'ofèrtas, contactatz-nos per mail :

contact@emplec.com

Servici de l'Emplec
Institut d'Estudis Occitans
11 carrièra Malcosinat
31000 Tolosa

POSTULAR

Dins aquela rubrica son totes los conselhs per plan aprestar son cv, sa letra de motivacion, l’entreten d’embaucha, adaptar son perfil a l’espèra de l’emplegaire.

A. Preparar l'argumentacion de l'entrevista d'emplec

B. Respóner a ua auhèrta d'emplec

C. Lo C.V

D. Las negociacions

E. La letra de motivacion

F. La candidatura espontanèa

 

A. Preparar l'argumentacion de l'entrevista d'emplec

Qu’auretz de plan preparar la vòsta entrevista entà poder arribar lo mei hidançós possible e donc estar rassegurant per l’interlocutor en poder respóner au mei lèu shens estar susprés gràcias a las vòstas anticipacions.

Çò que cèrca l'entrepresa pendent ua entrevista d'emplec :

  • un candidat dab un perhiu adequat :

    • competéncias e coneishenças respècte a las exigéncias de l'emplegaire

    • personalitat compatibla dab çò qu'espèra l'emplegaire

  • testar la motivacion deu candidat : Lo recrutaire ei tostemps a esperar que va trobar quauqu'un que n'ei pas sonque motivat peu salari e las condicions de tribalh, mes quauqu'un que pòrta un interès au pòste de tribalh e tanben a l'entrepresa e au sué environament.

Qu'ei pr'amor d'aquò que cau tostemps plan pensar a preparar questions entà plan conéisher lo pòste e amuishar lo sué interès. Lo candidat deu questionar, qu'ei l'escagença de véger que lo pòste e las suas condicions corresponen plan a çò que cercam.

Tota la preparacion de l'entrevista d'emplec que deu donc amuishar qu'ètz la bona persona.


Entà aquò qu'avetz de preparar quate serias de questions :

  • questions respècte a las competéncias

  • questions respècte a las coneishenças exigidas

  • questions respècte a la personalitat cercada

  • questions"tradicionaus”

 

1. Las questions de competéncias e de coneishenças

Entà plan amuishar qu'ètz lo candidat adequat per las exigéncias de l'entrepresa, qu'avetz de :

  • tornar analisar l'auhèrta d'emplec (véger la fica "causir ua auhèrta” e listar las exigéncias de l'entrepresa. En principi lo recrutaire que'vs questionarà sus cadua d'aqueras exigéncias.

  • Qu'avetz donc de listar totas las responsas correspondentas.

Las responsas que daratz auràn d'estar responsas d'entrevista qu'ei a díser :

  • jamei ua responsa per òc o non

  • tostemps ua responsa plan argumentada

  • ensajar de tostemps dar un exemple de mesa en aplicacion entà amuishar çò que sabetz hèr e qu'avetz hèit ja. Parlatz de la situacion dens las vòstas ancianas experiéncias on avetz emplegat tau experiéncia o tau coneishença.

Listar las competéncias e las coneishenças que pòden servir :
Sus aqueste pòste de tribalh, amuishar que las avetz e a quina escagença las avetz utilizadas (véger tanben l'article quin analisar lo sué perhiu).

2. Las questions de personalitat e las questions tradicionaus pendent l'entrevista 

Entà tractar las questions de personalitat e donc entà amuishar qu'avetz las qualitats cercadas per l'entrepresa, que'vs cau tostemps poder argumentar dab ua mesa en situacion deu vòste passat. L'idea qu'ei de díser "qu'ei aquera qualitat, per exemple dens aquera situacion jo que hasoi aquò”.


Entà las questions tradicionaus que las vos cau preparar. Sovent aqueras que pòden estar importantas entà causir entre dus candidats "valables” tan mei qu'aqueras questions se tròban normaument en fin d'entrevista.
Aqueras questions pòden estar per exemple : Datz-me tres de las vòstas qualitats e tres defauts, Digatz-me çò que vs'atira dens la nosta entrepresa, Quin vegetz la vòsta mission e la vòste integracion dens l'entrepresa ?, E pensatz que podratz suportar lo ritme, la responsabilitat...? etc.
A totas aqueras questions que cau dar responsas argumentadas qui amuishan la vòsta capacitat entà assumir aqueth emplec mes shens dar un imatge de quauqu'un de tròp segur d'eth medish.

3. Preparar la conclusion de l'entrevista

La conclusion de l'entrevista qu' ei normaument lo moment d'anar de cap a las vòstas questions que sia sus la condicions de tribalh o entà demandar darrèras precisions suu pòste. Que cau tostemps preparar questions entà amuishar un interès pregond.

B. Respóner a ua auhèrta d'emplec

Un còp seleccionadas las auhèrtas que vos interessan, vos va caler respóner, qu’ei a díser amuishar au recrutaire la vòsta motivacion (interès tau pòste de tribalh eth medish) e l’adequacion qu’existeish entre lo vòste perhiu e çò qu’ei demandat dens l’auhèrta d’emplec.

La prumèra causa de hèr qu’ei d’espiar la faiçon de contactar decidit per l’emplegaire e d’organizar la vòsta responsa en foncion.

Entà respóner a ua auhèrta d’emplec, tostemps que calerà hornir ua letra de motivacion e un CV, lhevat si :

  • Demanda exprèssa de l’emplegaire :

    • l’emplegaire pòt demandar de telefonar dirèctament : dens aqueste cas que’vs calerà plan preparar a passar ua entrevista au telefòne e se va plan, ua vertadèra entrevista dens la seguida.

    • l’emplegaire que’vs pòt demandar de’vs presentar dab un CV suu lòc de tribalh. Benlèu, ne calerà pas sonque deishar lo CV a l’arcuelh, mes que podetz tanben encontrar dirèctament lo responsable que serà dens lo sué establiment. Dens aqueste cas que’vs calerà preparar a la possibilitat de passar ua entrevista d’emplec. Quan seré un biaish de hèr que pareish mei aisit, ne’s cau pas enganar, averatz de plan preparar lo vòste CV e la vòsta entrevista d’emplec.

    • en cas de candidatura en linha : sus internet, de mei en mei vegem s’espandir la candidatura en linha. Plan segur la presentacion d’internet e las responsas a hicar au-deguens de carrats pòden deishar pensar qu’ei mensh formau, mes aquò n’ei pas sonque ua impression. Que cau pensar que l’interès d’aqueste tipe de candidatura ei que representa un biaish de difusar important, un metòde estandard e ua possibilitat de plegar tot lo mond au medish imperatiu shens poder evitar ua question que poderé pausar problèmas. Qu’auratz donc d’estar rigorós e de plan pensar que los objectius de la responsa ei d’amuishar lo vòste interès e la vòsta capacitat entà ocupar aqueste pòste de tribalh. Au-deguens d’aqueras candidaturas en linha, que podem distinguir dus tipes :

      • las candidaturas en linhas on dèishan hèra de plaça entà hicar un tèxte sus la vòstas motivacion e demandan de hornir en pèça junta un CV. Aquiu lo biaish de hèr ei aisit, n’i a pas arren mei de hèr que de hicar la vòsta letra de motivacion au-deguens deu tèxte e de pas desmembrar la pèça junta.

      • las candidaturas en linhas "a trauc”. Aquiu l’emplegaire a tot hèit entà aver ua vertadèra responsa exaustiva e confòrma a las suas espèras. Sovent, que trobaratz mantuas rubricas, mes ne cau pas aver paur e plan pensar que los objectius deus emplegaires e/o recrutaires son tostemps los medeish. Que’vs podem conselhar de preparar ua letra de motivacion e un CV e repréner los argumentaris au-deguens de la candidatura en linha. Non deveratz pas jamei desmembrar d’argumentar las vòstas responsas.

Quina que sia l’auhèrta d’emplec, tostemps cau mandar ua letra de motivacion e un CV plan adaptats a cada auhèrta d’emplec. N’ei pas au recrutaire d’anar cercar las entre-senhas màgers un drin pertot au bèth miei deu vòste CV o de la vòsta letra, mes qu’ei a vos de plan expausar los vòstes arguments.

Un aute biaish de preseleccion que pareish s’esténer : l’entrevista telefonica. Un còp après aver aver responut a ua auhèrta que sia per corrièr o per mèl, de mei en mei los recrutaires s’ajudan de l’entrevista telefonica. Que hèn ua prumèra seleccion en foncion deus CV e de las letras e quan, a l’escagença d’un recrutament lo nombre de candidats que pareishen interessants ei pro important, lo recrutaire utilizarà l’entrevista telefonica entà afinar la seleccion.

Au parat d’aquesta entrevista que cau distinguir dus cas :

  • N’ètz pas previenut a l’avança. S’ètz a casa, demandatz ua minuta entà trobar lo dossièr dab l’auhèrta, lo CV e la letra per aver de que emparar las vòstas responsas.

  • S’ètz assabentat, que devetz preparar aquera entrevista atau coma s’estosse ua entrevista d’emplec "normau” (véger fica : Conselhs entà passar ua entrevista d’emplec, e : Preparar l’argumentacion de l’entrevista d’emplec)

Plan segur, entà preparar ua responsa que’vs calerà preparar tot un argumentari respècte au CV e la letra motivacion. Entà hèr aquò que’vs calerà referir a las ficas tematicas.

 

C. Lo C.V

Abans d’entrar dens l’elaboracion deu CV, vos cau plan saber que entà respóner a ua auhèrta d’emplec lo CV deu estar acompanhat per ua letra de motivacion. Entà hornir un bon CV que cau seguir quauquas règlas :

 

1. Escríver entaus autes :

Com cada utís de comunicacion un CV que deu estar elaborat dab l'amira de facilitar la compreneson de la persona que'u legeish. Que cau donc hèr esfòrç tà que lo CV sia :

  • un document shens ambigüitat entau legedor : pas de mot ambivalent o fosc, pas d'abreviacions desconeishudas deu gran nombre, estar precís e poder quantificar quan ei possible.

  • pas tròp long : un bon CV n'ei pas forçadament un CV long, un CV de començant ne pòt pas passar mei d’ua pagina. Lo CV qu'a foncion de perméter la conversacion, qu'ei gràcias au CV qu'argumentaratz en ajustar comentaris e precisions au moment de l'entrevista professionau (véger la fica Preparar l'argumentacion de l'entrevista d'emplec)

  • un document plan presentat, ua mesa en pagina sòbra (lhevat tà las professions artisticas) dab ua poliça classica, que permet de destacar aisidament las informacions màgers e que facilita la lectura.

  • un títol. Que cau tostemps balhar un títol au CV : lo monde qui receben las auhèrtas pòden tractar un heish d'auhèrtas ; los cau simplificar lo tribalh, balhar lo nom deu poste e se i a, la referéncia. L'elaboracion deu CV deu amuishar a l'encòp un esperit de sintèsi e ua rigor. 

2. Un CV per un poste:

L'objectiu deu CV qu'ei d'amuishar que posseditz plan las competéncias e los sabers necessaris entà poder ocupar eficaçament lo pòste de tribalh. Atau, avetz mestièr de desvolopar suu CV sonque las experiéncias e los estudis en ligason dab lo poste. Dab tròp d'informacions, las competéncias e los estudis importants que pèrden visibilitat e lo CV vaderà mensh eficaç.

3. Un CV que càmbia en foncion de l'atge e de l'experiéncia :

Plan segur, lo CV s'adapta a l'epòca de la vita tanben. Per exemple un demandaire d'emplec que sorteish deu sistèma escolar deurà plan descríver los sons estudis, las competéncias lingüisticas e informaticas, los sons memòris se n'i a, los son estagis e los petits emplecs d'estiu. L'idèa ei d'amuishar que possedeish los sabers fondamentaus, e que gràcias au son dinamisme, ei prèste a dintrar dens lo monde de l'entrepresa. Au contrari, ua persona qui a hòrt d'experiéncia ne va pas detalhar tot lo son caminament professionau. Mencionarà sonque lo son darrèr diplòma o un diplòma qui hè necèra entà la profession concernida per l'auhèrta ; per contra desvoloparà plan la sua experiéncia professionau qui aurà un interès per la sua candidatura.

4. Las rubricas :

Plan segur, n'existeish pas un document tipe d'emplear, mès sovent dens lo CV caben las rubricas seguentas : estat civil, formacion, experiéncia professionau, autas competéncias, divèrs.

  • L' Estat Civil : mencionatz tostemps :

    • lo nom d'ostau

    • lo petit nom

    • l'edat (o la data de naishença)

    • podetz ajustar la vòsta qualitat (maridat, celibatari, nombre d'enfants)

    • tostemps méter la vòsta adreça, lo(s) numèro(s) de telefon e lo mèl (pr'amor l'objectiu d'un CV qu'ei d'aver un rendetz-vos e donc de poder estar contactat).

    • La fotó n'ei pas obligatària, mei que mei se n'ei pas demandada sus l'anóncia, ne la cau pas jamei méter se ne vos met pas en valor. La fotó ne deu pas estar tròp grana e deu estar formau.

  • Formacion : Atencion a detalhar unas abreviacions qui poden non pas estar compresas de tots. Quan i a un interès, balhatz las opcions o los subjèctes de memòris. Plan segur e se i a un interès, podetz balhar los vòstes diplòmas mès tanben, informacions sus totas las formacions qu'avetz seguidas. Per tota la rubrica, guardatz la medisha presentacion.

  • Experiéncia professionau  : Desvolopatz sonque las experiéncias en relacions dab lo poste. Emplegatz un vocabulari professionau, descrivetz la vòsta plaça ierarquica, las vòstas responsabilitats, la vòsta autonomia e las vòstas missions. Aquiu tanben que cau gardar la medeisha presentacion sus tota la rubrica. Pensatz a plan méter la natura deu contrat : qu'ei mei aisit d'explicar perque cambiatz hòrt de tribalh s'ei pr'amor que tribalhatz sonque sus postes en CDD. Avisatz-vos de ne pas mentir, pr'amor, de mei en mei d'emplegaires verifican las informacions dadas peus CV.

  • Autas competéncias : Aquiu podetz ajustar uas informacions atau coma las competéncias lingüisticas o informaticas... Que cau aquiu ensajar de guardar ua presentacion coërenta dab las formacions.

  • Divèrs : Aquera rubrica n'ei pas obligatòria. Qu'i podetz méter lo permés de miar e las vòstas passions. Avisatz-vos de l'interès d'aquò, pr'amor per còp aquò pòt desembocar sus representacions en çò deu vòste interlocutor, mes d'un aute costat que pòt amuishar qualitats recercadas dens ua entrepresa (dinamisme, tribalh en equipa). Plan segur se coneishetz l'emplegaire e qu'avetz ua passion en comun, que la calerà mencionar. Véger çò qui càmbia dab ua candidatura en occitan.

 

D. Las negociacions

Au parat d’ua entrevista d’emplec, las negociacions qu’arrepresentan lo cap deu procèssus : qu’avetz responut a ua auhèrta o mandat ua candidatura espontanèa, l’entrepresa que’vs seleccionè entà passar l’entrevista. Adara arriba la fin de l’entrevista e podetz parlar de las condicions.

La règla màger qu’ei de ne pas jamei aviar las negociacions abans la fin de l’entrevista. Se’n parlatz pendent ua sonada o dens la letra de motivacion, l’emplegaire que’s va pensar que cercatz mei un salari que non pas un tribalh e se parlatz d’aquò entà aviar l’entrevista d’emplec que vatz dar l’impression de pensar que lo recrutament qu’ei hèit, e consideratz qu’ei ganhat e donc qu’ei a l’emplegaire de s’adaptar a las vòstas exigéncias.

Abans de negociar qué que sia, que’vs calerà pensar a la question seguenta :

  • quau ei lo vòste poder de negociacion ?

Atau com dens cada negociacion, la resulta que depen deus poders de negociacion de las duas partidas.

Prumèr, que vam véger los factors que van influar la negociacion e dens quin sens.

L’auhèrta d’emplec :

  • L’auhèrta dona un escart possible atau com "de 1500 a 1750 € mesadèrs”. Qu’apareish alavetz plan evident qu’auretz de negociar tot en demorant dens lo limit. Que’vs calerà tanben pensar que l’entrepresa va hèr la sua causida en foncion d’un bon rapòrt qualitat-prètz entremiei los candidats, donc mei e demandatz mei e’vs calerà poder justificar d’un perhiu ideau. Ne serveish pas ad arren de’s presentar a ua auhèrta dab ua remuneracion hèra mei baisha que çò que voletz.

  • L’entrepresa anóncia un prètz hèra mei baish qu’aqueste deu mercat e precisa sonque "de negociar”. Aquiu que serà a vos de’vs posicionar, de’vs véner tot en pensant que jamei un emplegaire ne paga pas en foncion d’ua persona mes deu pòste a tiéner. Qu’auretz donc de plan pensar de ne pas estar desconectat deus imperatius deu mercat (avetz de conéisher los salaris en vigor dens lo sector d’activitat en question).

Lo mercat de l’emplec :

Plan segur que cau analisar la vòsta situacion en tiéner compte deu segment deu mercat de l’emplec.

  • S’ètz dens ua profession on la demanda de tribalh (entrepresas qui recrutan) qu’ei hèra mensh hòrta que l’auhèrta de tribalh, ne poderatz pas ensajar de negociar. Senon, l’emplegaire que prenerà lo segond de la lista.

  • Au contrari, dens ua situacion dab ua demanda de tribalh hèra mei importanta que l’auhèrta, qu’auretz normaument la possibilitat de profieitar de condicions de las bonas suu mercat. Quan seré gràcias a condicions particularas ne’vs cau pas abusar deu vòste poder de negociacion, senon a tèrmi la vòsta situacion serà tancada per manca de hidança. E entà las possibilitats de progressar, l’emplegaire cercarà quauqu’un que ne’u dona pas l’impression de hèr un chantatge gràcias a la sua posicion favorabla.

Considerar l’ensem de la vòsta remuneracion :

Abans de negociar vos cau plan pensar a çò que representa l’ensem de la vòsta remuneracion : tretzau mes, prevedença, participacion, interessament a la chifra d’ahar, tiquets restaurant...

 

E. La letra de motivacion

Aquera letra qu’ei mei qu’ua letra entà acompanhar [lo CV->art25]. Sovent qu’ei la pèça mestra de la candidatura. Lo son prètzhèit ei de convéncer lo recrutaire qu’ètz lo bon candidat, e donc obtiéner ua entrevista d’emplec.

La letra de motivacion ei un utís entà amuishar l’adequacion qu’existeish entre lo vòste perhiu e los besonhs de l’entrepresa.

 

Tà aquò, vos cau plan expausar :

- Las vòstas competéncias : Tot çò que sabetz hèr suu poste de tribalh gràcias a las vòstas experiéncias professionaus.

 

- Las vòstas coneishenças : Tot çò qu’ei teoric, çò qu’avetz aprés en formacion iniciau e en formacion continua. Avisatz-vos : la letra de motivacion ne deu pas estar ua descripcion de la vòsta carrièra, mes un argumentari de la vòsta utilitat entà l’entrepresa, illustrada dab quauques elements de la vòsta carrièra que son de bon destacar. Entà provar qu'ètz la bona persona, la vòsta letra que deu contiéner dus tipes d’arguments :

1. Amuishar qu'ètz un professionau La quita letra que’vs deu perméter d’exprimir las vòstas qualitats professionaus : causida de la bona terminologia, eficacitat (pas de letras longassas, un paragrafe per ua idea), e precision (tostemps precisar lo poste e las mission que cercatz…).

2. Amuishar qu'ètz la bona persona : Lo legedor deu sentir la vòsta motivacion : coneishença de l’entrepresa, deu sector, identitat de la persona a qui enviatz la letra…

 

Siatz dinamic : emplegatz de vèrbes d’accions entà plan presentar çò qu'ètz en capacitat de portar a l’enterpresa, shens ventar-vos pr'amor la letra deu tanben estar un acte de saber víver.

 

La Presentacion de la letra : La letra deu càber dens ua pagina maximum, sovent d'aquera faiçon :

 

- Coordonadas deu candidat : -** Nom d’Ostau -** Petit Nom -** Adressa -** Telefona e portable -** Corrièl

 

- Coordonadas deu recrutaire : -** Dauna, Sénher Nom d’Ostau/Petit Nom -** Pòste dens l’entrepresa -** Entrepresa

 

- Lòc e data

 

- Objècte : precisar s’ei ua candidatura espotanea o se responetz a ua auhèrta (hicar la referéncia)

 

- Formula d’apèl Ex : Estimat President/Sénher Director/ Dauna... 

 

- Introduccion tà captar l’atencion e plan hèr véger qu’avetz comprés çò que recèrca l’entrepresa.

 

- Desvolopament : Presentacion deus argumentaris tà indicar l’adequacion enter çò que hè necèra a l’entrepresa e lo vòste perhiu professionau e personau (véder los explics çaí dessús).

 

- Prepausicion de rencontre : obligatòria pr'amor que l’objectiu de la letra ei d’aver ua entrevista d’emplec.

 

- Formula de cortesia (En vos hèr aunor). - Signatura Entaus arguments, véger tanben l'article Analizar lo sué perhiu e puish qui preparar l'argumentacion de l'entrevista d'emplec.

 

F. La candidatura espontanèa

Lo principi de la candidatura espontanèa qu’ei de prepausar los vòstes servicis a ua entrepresa gràcias a ua letra de motivacion e a un CV. L’objectiu qu’ei sus dus nivèus, au minimum esperar que l’entrepresa guarde lo vòste CV tà un recrutament a viéner, e au maxímum çò qu’ei l’objectiu de cada letra de motivacion : aver ua entrevista d’emplec.

La candidatura espontanèa qu'ei un utís de bon emplegar pr'amor sovent abans de publicar ua auhèrta d'emplec lo mond qu'espian dens las pièlas de CV qu'an a disposicion.

Çaquelà un esfòrç entà plan adaptar la letra de motivacion a las exigéncias de la candidatura espontanèa qu'ei necessari. Alavetz, entà plan compréner quin hèr ua candidatura espontanèa, que'vs calerà seguir los conselhs seguents :

 

1. Individualizar la preposicion :

Que cau plan véger que, dab la candidatura espontanèa, lo rapòrt normau que caracteriza lo recrutament càmbia : dens aqueste cas qu'ei lo candidat que prepausa un servici a quauqu'un que n'a pas demandat que que sia.

Aqueste aspècte qu'obliga lo candidat a detectar un besonh de l'entrepresa, puish hèr ua preposicion d' ua mission que pòt miar en correspondéncia dab lo besonh ciblat. Mandar ua letra, shens preposicion de mission o au mensh demanda d'integracion au deguens d'un servici precís que revien a hèr ua comunicacion shens prepausar un vertadèr posicionament. Qu'ei donc ua maishanta comunicacion que va sonque perturbar dens lo sué tribalh la persona qui va recéber la letra.

2. Identificar l'interlocutor :

Un còp plan pensat lo servici que podetz hèr dens aquera entrepresa, que devetz plan identificar la persona a qui cau mandar la letra e lo CV. La màger part deu temps que'vs calerà saber qui s'ocupa de la ressorças umanas, mes dens lo cas d'ua entrepresa de las bèlas dab mantuns servicis que'vs calerà saber quin s'organiza l'entrepresa e qui ei la persona qui ei responsabla deu servici.


Plan sovent qu'ei interessant de mandar la letra au director de las ressorsas umanas e a la persona que possedeish la competéncia tecnica (un responsable de servici o lo responsable de siti).
Entà arrecaptar totas aqueras entresenhas, normaument, que bastarà de hèr ua sonada a l'entrepresa per demandar aqueras entre-senhas.

3. Adaptar la letra de motivacion e lo CV :

Atau com l'avem vist, lhevat raras excepcions, ne serveish a d'arren de mandar un CV sol o dab ua "letra d'acompanhament tipe”. Que cau tostemps mandar ua letra adaptada a l'entrepresa e a la vòsta preposicion de mission dab un CV que correspon a aquera demanda. Per mei d'entresenhas sus la manièra de plan redigir lo CV e la letra de motivacion que podetz consultar las ficas tematicas que lor son consacradas.

4. Tostemps remembrà's l'objectiu :

L'objectiu qu'ei d'obtiéner un rendètz-vos dab un emplegaire potenciau. Que'vs cau tostemps guardar aqueste objectiu a l'esperit. Entà complir aquera tòca que 'vs calèra :

  • plan pensar a individualizar la vòsta preposicion (dab la mission que pensatz poder tiéner).

  • comunicar dens la letra de motivacion la vòsta volontat d'encontrar lo recrutaire au parat d'ua entervista d'emplec. Normaument, aquera frasa que deu estar la darrèra de la letra abans la formula de cortesia e que pòt se formular atau (per exemple) : "Que demori a la vòsta disposicion per tota entre-senha mei dens l'espèra d'ua entrevista”.